Afg‘onistonda “islom diniga va mamlakat manfaatlariga zid” kitoblar musodara qilinadi, dedi “Tolibon” hukumatining Axborot va madaniyat vazirligi matbuot kotibi Abdulhaq Hamid. Bu haqda TOLOnews telekanali xabar bermoqda.
Ta’kidlanishicha, nashriyotlar nomaqbul deb topilgan minglab kitoblarni Axborot va madaniyat vazirligiga topshirishni boshlagan.
“Bozorda hali ham islomga, islom tamoyillariga zid yoki sekulyarizm kabi boshqa mafkuralarni targ‘ib qiluvchi yuzlab kitoblar mavjud. Shuningdek, yoshlarning axloqini buzuvchi kitoblar ham bor”, — deydi vazirlik matbuot kotibi.
Afg‘oniston nashriyoti va kitob sotuvchilari ittifoqining ta’kidlashicha, “Tolibon” tomonidan nomaqbul deb topilgan kitoblar chet el harbiylari mamlakatda bo‘lgan 20 yil davomida Afg‘onistonga olib kelingan yoki nashr etilgan.
Tashkilot Afg‘onistonda bunday kitoblarning nashr etilishini to‘xtatish choralarini ko‘rishga va’da berdi.
“Biz milliy taranglikni, siyosiy muammolarni va mamlakatni inqirozga olib keladigan bo‘linishni kuchaytiruvchi kitoblarni boshqa nashr etmaslikka harakat qilamiz”, — dedi Afg‘oniston noshirlar va kitob sotuvchilar uyushmasi rahbari Sayid Ahmad Said.
“Biz Nashriyotlar uyushmasi hamda Axborot va madaniyat vazirligi tomonidan tasdiqlanadigan har qanday buyurtmani bajarishga tayyormiz. Bunday kitoblarni (hozir “Tolibon” nomaqbul deb hisoblayotgan) biz hech qachon nashr qilmaganmiz”, — deb ishontirdi noshirlardan biri.
2021-yil avgust oyida hokimiyatni qo‘lga kiritganidan so‘ng, “Tolibon” Afg‘onistonda so‘z va madaniyat erkinligini cheklash uchun izchil ravishda turli choralar ko‘rdi. Hukmronligining boshida “Tolibon” o‘nlab jurnalistlarni qamoqqa olgan. Ba’zilari keyinroq ozod qilindi, biroq qolganlari o‘z kasbi, xususan, toliblarni tanqid qilgani uchun uzoq muddat qamoq jazosiga hukm qilindi.
Izoh (0)