Украина президенти Владимир Зеленский урушнинг бир йиллиги муносабати билан ўтказилган матбуот анжуманида БМТнинг Украина бўйича резолюциясини қўллаб-қувватламаган давлатларга муносабат билдирди. Бу ҳақда “Fokus.ua” хабар берди.
Сиёсатчи уруш оқибатлари нафақат ҳудудларни, балки тирик одамларни ҳам йўқотишга олиб келишини қайд этди.
“Эҳтимол, жанг қилмасангиз ва йўқотмасангиз, нима бўлаётганини, бу ҳар бир киши учун қанчалик оғриқли эканини тушуниш жуда қийин”, — деди Украина президенти.
У урушдаги маълумотларни етказиш қийинлигини айтиб, шунинг учун журналистлар билан яқиндан ишлар олиб борилаётганини таъкидлади. Сиёсатчи четда туриб, уруш қандай кетаётганига ишончсизлик билан гапириш заиф позицияни эгаллаш ҳисобланишини қайд этди.
“Наҳотки уруш ва йўқотишлар, уруш ва қийноқлар, уруш ва зўрлаш ҳақиқатан ҳам керак? Одамлар қонли уруш оқибатларини баҳолаши учун у ҳақиқатан ҳам дунёдаги ҳар бир хонадонга кириши керакми? Шунинг учун дипломатия ва журналистика вазиятни тўғри етказиш мақсадида фаолият юритади. Резолюцияга қарши бўлганларга буни тушунтириш қийин, аммо биз ҳаракат қиламиз. Ҳа, БМТнинг Украина бўйича резолюциясига қарши бўлган олтита давлат бор. 141 та мамлакат уни қўллаб-қувватлади”, — деди у.
Зеленский Украина Африка қитъаси мамлакатлари томон қадам ташлаши кераклигини айтиб, мустақиллик йилларида Киев бу йўналишга эътибор бермаганини катта хато деб атади.
“Украина бу урушдан олдин кучли шерикларга эга эмас эди ва бу ҳақиқат. Ҳозир бўлганидан хурсандман, лекин тўлиқ эмас. Африка қитъаси, Лотин Америкаси етишмаяпти. Мен улар билан учрашув ўтказмоқчиман. Бунинг учун кеча-ю кундуз ишлашга тайёрмиз ва мустақилликнинг 30 йилида мана шундай қилиш керак эди”, — деди у.
БМТ Бош Ассамблеяси Украинадаги урушнинг бир йиллиги муносабати билан Украина ва унинг иттифоқчилари томонидан таклиф этилган, Россияни Украина ҳудудидаги ҳарбий ҳаракатларни тўхтатиш ва у ердан қўшинларни олиб чиқишга чақирувчи резолюцияни қўллаб-қувватлади. Резолюцияни қабул қилиш учун 141 давлат овоз берди. Яна 32 та давлат, жумладан, Ўзбекистон овоз беришда бетараф қолди. Етти давлат – Россия, Беларусь, Сурия, Шимолий Корея, Эритрея, Никарагуа ва Мали ҳужжатга қарши овоз берди.
Изоҳ (0)