Kambag‘allik ustidan to‘liq g‘alaba qozongan Xitoy davlatida yashovchi olimlar kambag‘allikni qisqartirish va bandlik vaziri Behzod Musayevga maslahatchi sifatida ish boshlaydi. Bu haqda “Daryo”ga vazirlik axborot xizmati xabar qildi.
“Xitoy kambag‘allik ustidan to‘liq g‘alaba qozongan birinchi mamlakat sanaladi. Xitoyning bu natijasi jahon hamjamiyatining eʼtiboridan chetda qolmadi va BMT hamda qator xalqaro tashkilotlar tomonidan eʼtirof etildi. O‘zbekiston va Xitoyning strategik sherikligi Xitoyning bu boradagi ilg‘or tajribasini o‘rganish uchun keng imkoniyat bermoqda. Kambag‘allikka qarshi kurashda Xitoy tajribasini o‘rganish va joriy etish bo‘yicha hamkorlik qilish maqsadida O‘zbekistonning Xitoydagi elchixonasi ko‘magida xitoylik olimlar Zhang Qi va Vang Xiao Li O‘zbekistonga taklif qilindi”, — deydi vazirlik axborot xizmati masʼuli.
Taʼkidlanishicha, kambag‘allikni qisqartirish va bandlik vazirligi rahbariyati bilan bo‘lib o‘tgan uchrashuvda hamkorlikdagi ishlar muhokama qilingan.
“O‘zbekiston hukumati kambag‘allikni kamaytirishga qanchalik katta eʼtibor qaratayotganini qisqa vaqt ichida his qildik va biz belgilangan maqsadlarga erishishda yordam berishga tayyormiz”, — deydi Pekin pedagogika universitetining Iqtisodiyot va resurslarni boshqarish instituti professori Zhang Qi.
Qo‘shimcha qilinishicha, dastlabki bosqichda mutaxassislar hududlarga safar qilib, sohadagi ishlarning bugungi holatini o‘rganadi. Tahlil natijalariga ko‘ra kambag‘allikni aniqlashning moliyaviy va nomoliyaviy mezonlarini ishlab chiqish rejalashtirilgan.
“Keyinchalik, ilmiy yondashuv asosida kambag‘allikdan chiqish bo‘yicha maqsadli dasturlar ishlab chiqilib, ular viloyatlar, tumanlar va mahallalar miqyosida amalga oshiriladi. Shuningdek, ushbu dasturlarning samaradorligini monitoring qilish mexanizmini joriy yetish nazarda tutilgan. O‘quv dasturlarini qayta ko‘rib chiqish orqali kasb-hunar taʼlimi tizimini o‘zgartirishga alohida eʼtibor qaratiladi. Ushbu chora kadrlar tayyorlash borasida ichki va tashqi mehnat bozorida talabga ega bo‘lgan zamonaviy bilim va ko‘nikmalarni shakllantirish imkonini beradi”, — deydi vazirlik axborot xizmati masʼuli.
Izoh (0)