Хитойлик амалиётчи олимлар камбағалликни қисқартириш ва бандлик вазирига маслаҳатчи сифатида иш бошлайди

Камбағаллик устидан тўлиқ ғалаба қозонган Хитой давлатида яшовчи олимлар камбағалликни қисқартириш ва бандлик вазири Беҳзод Мусаевга маслаҳатчи сифатида иш бошлайди. Бу ҳақда “Дарё”га вазирлик ахборот хизмати хабар қилди.

“Хитой камбағаллик устидан тўлиқ ғалаба қозонган биринчи мамлакат саналади. Хитойнинг бу натижаси жаҳон ҳамжамиятининг эътиборидан четда қолмади ва БМТ ҳамда қатор халқаро ташкилотлар томонидан эътироф этилди. Ўзбекистон ва Хитойнинг стратегик шериклиги Хитойнинг бу борадаги илғор тажрибасини ўрганиш учун кенг имконият бермоқда. Камбағалликка қарши курашда Хитой тажрибасини ўрганиш ва жорий этиш бўйича ҳамкорлик қилиш мақсадида Ўзбекистоннинг Хитойдаги элчихонаси кўмагида хитойлик олимлар Зҳанг Қи ва Ванг Хиао Ли Ўзбекистонга таклиф қилинди”, — дейди вазирлик ахборот хизмати масъули.

Таъкидланишича, камбағалликни қисқартириш ва бандлик вазирлиги раҳбарияти билан бўлиб ўтган учрашувда ҳамкорликдаги ишлар муҳокама қилинган.

“Ўзбекистон ҳукумати камбағалликни камайтиришга қанчалик катта эътибор қаратаётганини қисқа вақт ичида ҳис қилдик ва биз белгиланган мақсадларга эришишда ёрдам беришга тайёрмиз”, — дейди Пекин педагогика университетининг Иқтисодиёт ва ресурсларни бошқариш институти профессори Зҳанг Қи.

Қўшимча қилинишича, дастлабки босқичда мутахассислар ҳудудларга сафар қилиб, соҳадаги ишларнинг бугунги ҳолатини ўрганади. Таҳлил натижаларига кўра камбағалликни аниқлашнинг молиявий ва номолиявий мезонларини ишлаб чиқиш режалаштирилган.

“Кейинчалик, илмий ёндашув асосида камбағалликдан чиқиш бўйича мақсадли дастурлар ишлаб чиқилиб, улар вилоятлар, туманлар ва маҳаллалар миқёсида амалга оширилади. Шунингдек, ушбу дастурларнинг самарадорлигини мониторинг қилиш механизмини жорий етиш назарда тутилган. Ўқув дастурларини қайта кўриб чиқиш орқали касб-ҳунар таълими тизимини ўзгартиришга алоҳида эътибор қаратилади. Ушбу чора кадрлар тайёрлаш борасида ички ва ташқи меҳнат бозорида талабга эга бўлган замонавий билим ва кўникмаларни шакллантириш имконини беради”, — дейди вазирлик ахборот хизмати масъули.