Prognozlashtirish va makroiqtisodiy tadqiqotlar instituti (PMTI) ekspertlari 2017—2022-yillar oralig‘ida O‘zbekistonda yo‘lovchilarni tashish sohasida ro‘y bergan o‘zgarishlarni tahlil qildi.
Tahlil 2017—2022-yillar oralig‘ida mamlakatda yo‘lovchilarni tashish va yo‘lovchi aylanmasida o‘sish bo‘lganligini ko‘rsatdi. Xususan, 2017-yilda barcha transport vositalari orqali 5,7 milliar kishi o‘z manziliga yetkazilgan bo‘lsa, 2022-yilda bu ko‘rsatkich salkam 6,2 milliard kishini tashkil etdi. Yo‘lovchi aylanmasi esa 130 milliard yo‘lovchi-km dan 144,7 milliard yo‘lovchi-km ga oshgan.
2022-yilda yo‘lovchi tashishda avtomobil transportining ulushi 97,5 foizni tashkil qilgan. Agar 2017-yilda 5,6 milliard kishi manzilga yetkazilgan bo‘lsa, 2022-yilda ularning soni 6 milliard kishini tashkil qilgan.
Avtomobil transportida yo‘lovchi aylanmasi mos ravishda ortib, 117,7 milliard yo‘lovchi-km dan 129,2 milliard yo‘lovchi-km ga yetgan.
2017—2022-yillarda metropolitendan foydalangan yo‘lovchilar soni 2 marotaba oshgan va 61,6 million kishidan 136,7 million kishiga yetgan.
Mutanosib ravishda yo‘lovchi aylanmasi ham 459,1 million yo‘lovchi-km dan 996,8 million yo‘lovchi-km ga ko‘paygan.
Havo transporti vositasida tashilgan yo‘lovchilar ham mazkur davr mobaynida qariyb 2 barobar oshgan va 2,2 million kishidan 4,1 million kishiga yetgan. Yo‘lovchi aylanmasi 7,5 milliard yo‘lovchi-km dan 10,9 milliard yo‘lovchi-km ga ortgan.
2026-yilgacha yo‘lovchi tashish xizmatlarini rivojlantirish maqsadida mamlakatimizda:
- aholi punktlarining jamoat transporti bilan qamrovini 95% ga yetkazish va 278 ta yangi avtobus yo‘nalishini ochish;
- hududlardagi 11 ta xalqaro aeroportning o‘tkazish imkoniyatini 2 barobar oshirish va mahalliy tashuvlarda xususiy va loukoster aviakompaniyalar ulushini bosqichma-bosqich 25 foizgacha oshirish;
- metropolitenning umumiy uzunligini 157 kilometr, stansiyalar sonini 74 taga yetkazish rejalashtirilgan.
Izoh (0)