O‘zbekistonda yanvar oyida elektromobillar sotuvi 431 donani tashkil etdi, bu 2022-yil dekabrga nisbatan 3 foizga (+13 dona) ko‘proq. Bu haqda “Daryo”ga Iqtisodiy tadqiqotlar va islohotlar markazi ma’lum qildi.
Eng ko‘p elektromobillar Toshkent shahrida — 319 dona, Toshkent — 44 dona va Farg‘ona viloyatlarida — 13 dona sotilgan.
2022-yil yanvar oyiga nisbatan elektromobillar sotuvi 85 foizga (+198 dona) oshdi.
Elektromobillarga bo‘lgan talabning ortib borayotgani ularning bojxona to‘lovlari, aksiz solig‘i va avtotransport yig‘imlaridan ozod etilgani bilan bog‘liq.
Xususan, 2021-yildan 2022-yilgacha bozor 3 baravarga, ya’ni 1,7 mingdan 5,9 mingta elektromobilga o‘sdi.
Iqtisodiy tadqiqotlar va islohotlar markazi hisob-kitoblariga ko‘ra, hukumat tomonidan qabul qilingan chora-tadbirlar tufayli elektromobillar bozorining yanada o‘sishi prognoz qilinmoqda.
Xususan, elektromobillar va ehtiyot qismlarni O‘zbekistonda ishlab chiqarishni tashkil etish, xaridorlarga mahalliy elektromobillar sotib olishda kredit foizlarini qoplash uchun kompensatsiya to‘lash qo‘llab-quvvatlanmoqda.
Bundan tashqari, 2023—2025-yillarda O‘zbekistonda elektromobillar ishlab chiqarishni rag‘batlantirish maqsadida davlat ulushi 50 foizdan oshmaydigan davlat organlari, mahalliy hokimliklar va korxonalar tomonidan elektromobillar sotib olish rejalashtirilgan.
Izoh (0)