Prognozlashtirish va makroiqtisodiy tadqiqotlar instituti (PMTI) mutaxassislari tomonidan so‘nggi yillarda O‘zbekistonda turizm sohasida amalga oshirilgan islohotlar va ularning asosiy natijalari o‘rganildi.
2017—2022-yillarda O‘zbekistonga kelgan chet ellik sayyohlar soni deyarli 2 barobar oshdi. Agar 2017-yilda ularning soni 2,7 million nafarni tashkil qilgan bo‘lsa, 2022-yilda bu ko‘rsatkich 5,2 million nafarga yetdi.
2022-yilda O‘zbekistonga sayyohlar asosan Qozog‘iston (1,6 mln kishi, 2017-yilda 1,8 mln kishi), Tojikiston (1,4 mln kishi, 2017-yildagiga nisbatan 5,5 barobar ko‘p) va Qirg‘izistondan (1,3 mln kishi, 2017-yildagiga nisbatan 3,6 barobar ko‘p) kelgan.
Xorijlik sayyohlarning asosoiy qismi, aniqrog‘i, 89,1foizi O‘zbekistonga o‘z qarindoshlarini yo‘qlash maqsadida kelgan. Ularning aksariyati Qozog‘iston (31,8 foiz), Qirg‘iziston (29,2 foiz) va Tojikiston (27,9 foiz) fuqarolaridir.
Dam olish va hordiq chiqarish maqsadida O‘zbekistonga eng ko‘p chet ellik fuqarolar Rossiya (37,6 foiz), Qozog‘iston (11,2 foiz) va Turkiyadan (6,3 foiz) kelgan.
Ma’lumot uchun: dunyodagi 91 ta mamlakat fuqarolari O‘zbekistonga kelish uchun vizasiz tartibdan foydalanishi mumkin. Taqqoslaydigan bo‘lsak, Qozog‘istonga 26 ta, Turkiyaga 41 ta, Gruziyaga esa 56 ta mamlakat fuqarolari vizasiz kela oladi.
2022-yilda O‘zbekistonga kelgan sayyohlar soni 2021-yildagiga nisbatan 3,4 million kishiga ko‘p bo‘ldi va o‘sish 2,8 barobardan ham ortiqni tashkil etdi.
Buning natijasida turizm xizmatlari eksporti sezilarli darajada oshdi. 2017-yilda turizm xizmatlari eksporti 546,9 million dollarni tashkil etgan bo‘lsa, 2022-yilda bu ko‘rsatkich 2,9 barobar oshib, 1,6 milliard dollarni tashkil etdi.
2017—2022-yillarda xizmatlar eksportining umumiy hajmida turizm xizmatlari eksportining ulushi 1,8 barobar oshdi. Agar 2017-yilda bu ko‘rsatkich 22,1 foizni tashkil etgan bo‘lsa, 2022-yilda 40,7 foizga yetdi.
Turizm sohasida amalga oshirilgan islohotlar samarasi sohaning salohiyati katta ekanligidan dalolat beradi. O‘zbekistonning jahon miqyosida turistik jozibadorligini oshirish uchun turizmning etnik va ekologik turizm kabi yangi yo‘nalishlarini rivojlantirish, shuningdek, mamlakatimizning turli hududlarida tematik festivallarni tashkil qilish taklif etilmoqda.
Izoh (0)