Ўзбекистонда сўнгги беш йилда йўловчиларни ташиш қандай ўзгарди?
Прогнозлаштириш ва макроиқтисодий тадқиқотлар институти (ПМТИ) экспертлари 2017—2022 йиллар оралиғида Ўзбекистонда йўловчиларни ташиш соҳасида рўй берган ўзгаришларни таҳлил қилди.
Таҳлил 2017—2022 йиллар оралиғида мамлакатда йўловчиларни ташиш ва йўловчи айланмасида ўсиш бўлганлигини кўрсатди. Хусусан, 2017 йилда барча транспорт воситалари орқали 5,7 миллиар киши ўз манзилига етказилган бўлса, 2022 йилда бу кўрсаткич салкам 6,2 миллиард кишини ташкил этди. Йўловчи айланмаси эса 130 миллиард йўловчи-км дан 144,7 миллиард йўловчи-км га ошган.
2022 йилда йўловчи ташишда автомобиль транспортининг улуши 97,5 фоизни ташкил қилган. Агар 2017 йилда 5,6 миллиард киши манзилга етказилган бўлса, 2022 йилда уларнинг сони 6 миллиард кишини ташкил қилган.
Автомобиль транспортида йўловчи айланмаси мос равишда ортиб, 117,7 миллиард йўловчи-км дан 129,2 миллиард йўловчи-км га етган.
2017—2022 йилларда метрополитендан фойдаланган йўловчилар сони 2 маротаба ошган ва 61,6 миллион кишидан 136,7 миллион кишига етган.
Мутаносиб равишда йўловчи айланмаси ҳам 459,1 миллион йўловчи-км дан 996,8 миллион йўловчи-км га кўпайган.
Ҳаво транспорти воситасида ташилган йўловчилар ҳам мазкур давр мобайнида қарийб 2 баробар ошган ва 2,2 миллион кишидан 4,1 миллион кишига етган. Йўловчи айланмаси 7,5 миллиард йўловчи-км дан 10,9 миллиард йўловчи-км га ортган.
2026 йилгача йўловчи ташиш хизматларини ривожлантириш мақсадида мамлакатимизда:
- аҳоли пунктларининг жамоат транспорти билан қамровини 95% га етказиш ва 278 та янги автобус йўналишини очиш;
- ҳудудлардаги 11 та халқаро аэропортнинг ўтказиш имкониятини 2 баробар ошириш ва маҳаллий ташувларда хусусий ва лоукостер авиакомпаниялар улушини босқичма-босқич 25 фоизгача ошириш;
- метрополитеннинг умумий узунлигини 157 километр, станциялар сонини 74 тага етказиш режалаштирилган.
