Қаршида янги сотиб олинган Cobalt’нинг нуқсонлари чиққани боис у бошқасига алмаштириб берилди. Бу ҳақда Истеъмолчилар ҳуқуқларини ҳимоя қилиш жамиятлари федерацияси хабар берди.
Қайд этилишича, Қарши шаҳрида яшовчи фуқаро Ҳ.Ў.нинг UzAvtoMotors томонидан ишлаб чиқарилган Cobalt русумли автомашинанинг сифатсизлиги тўғрисида 1091 ишонч телефони орқали қилган мурожаати Қарши шаҳар истеъмолчилар ҳуқуқларини ҳимоя қилиш жамияти томонидан ўрганилди.
Мурожаатда айтилишича, фуқаро “Қашқадарё автотеххизмат” МЧЖ автосалони билан 2022 йилнинг 23 майида тузилган шартномага мувофиқ 128 миллион 645 минг сўм тўлаб, Cobalt харид қилган. Шартнома шартларига кўра, машина 2022 йилнинг 31 октябрига қадар истеъмолчига етказиб берилиши белгиланган бўлса-да, 17 декабрь куни олиб келинган. Қолаверса, автомашинанинг ташқи бўёқ қисмида жиддий нуқсонлари борлиги маълум бўлган.
Ўрганиш давомида автомашинага бўяш воситаси белгиланган меъёрдан кам сепилгани аниқланган ва бу ҳақда автосалон мутасаддилари иштирокида далолатнома расмийлаштирилган.
Автомашинадаги нуқсонни сервис хизмати асосида бартараф этишнинг имкони йўқлиги ҳамда истеъмолчининг талабига кўра, амалдаги истеъмолчилар ҳуқуқларини ҳимоя қилишга оид қонунчилик асосида нуқсонли Cobalt автомашинаси ишлаб чиқарувчи томонидан янгисига алмаштириб берилган.
Изоҳ (0)