Қашқадарё вилоятининг Қарши туманида яшовчи фермер Бекзод Фармонов яхши ният билан ҳосилидан орттирган маблағига янги машина харид қилмоқчи бўлади. Шу мақсадда автосалонга бориб, беш-олти ойдан сўнг чиқувчи қиммат автомобиллардан бирига тўлов қилади. Бироқ фермер машина пулини тўласа-да, беш-олти ойдан сўнг машина миниш орзуси амалга ошмайди. Нега дейсизми? Банк ходимининг айби билан фермер тўлаган пул автосалон ҳисоб рақамига тушмайди. Фермер бу ҳақдаги ҳасратларини “Дарё” мухбири билан суҳбати давомида гапириб берди.
“2022 йилнинг июль ойида ‘Aloqabank’нинг Қашқадарё вилояти филиали орқали Gentra автомобили учун тўловни амалга оширдим. Банк орқали биринчи пластик карточкамдан 65 миллион, иккинчисидан эса 12 миллион сўм пул тўладим. Банк ходими тўловлар бўлгани ҳақидаги маълумотномаларни қўлимга тутқазиб, пул сўралган жойга ўтказилганини айтди. Хурсанд бўлиб уйга қайтдим. Орадан уч ой ўтгач, автосалонга бориб, машинам қачон чиқишини, қолган 50 фоиз тўловларни қачон тўлашим кераклиги ҳақида маълумот олмоқчи бўлдим. Автосалон ходимлари эса уларга менинг ҳисобимдан ҳеч қандай пул тушмаганини, шартноманинг 7 кунлик муддати ўтиб кетгани боис шартнома бекор бўлганини айтишди. Банкка келиб, вазиятга ойдинлик кирицам, банк ходимининг айби билан мен ўз вақтида тўлаган пулим автосалон ҳисоб рақамига тушмай, банкда қолиб кетган”, — дейди мурожаатчи фермер Бекзод Фармонов.
Янги машина миниш орзусида юрган фермернинг айтишича, мазкур муаммо юзага келгач, у банк раҳбариятига шикоят қилган.
.jpg)
“Бу муаммони билганимдан сўнг банк раҳбарига кирдим. Банк бошлиғи Алишер ака муаммо ходимининг айби билан юзага келганини, муаммони ечиш учун автосалон раҳбари билан гаплашиб, 2022 йилнинг декабрь ойида менга янги Gentra автомобилини олиб беришини айтди. Ва ўзларининг айби билан бекор бўлган шартнома ўрнига янги шартнома тузишди. Янги шартномада машинанинг салондан чиқиш муддати 2023 йил октябрь этиб кўрсатилаётганини, мен ўз вақтида пул тўлаганимни, шу сабаб 2022 йилнинг декабрь ойида янги машина олишим кераклигини айтдим. Улар шартнома шунчаки эканини, менга ваъда қилинган 2022 йилнинг декабрь ойида янги машина олиб чиқиб беришларини айтишди. Мен уларга ишондим ва улар айтгандек бошқа шартнома туздим”, — дейди фермер.
Бекзод Фармоновнинг айтишича, 2022 йилнинг декабрь ойида банк раҳбари ва автосалон масъули уни чақириб, “машинангиз заводдан чиқиб, автосалонга келди, мана бу машина сизники”, деб унга янги машина кўрсатган. Аммо кўп ўтмай бу ёлғон бўлиб чиққан.
“Мени чақириб, мана бу янги машина сизники, арзимас муаммоси қолди дейишгач, мен автомобиль тўловининг қолган қисмини ҳам тўлаб, машинанинг тўлиқ пулини тўладим. Лекин 2022 йилнинг декабрь ойи у ёқда турсин, 2023 йилнинг февраль ойида ҳам машинадан дарак йўқ. Банк раҳбарига нега мени алдадингиз десам, автосалон бошлиғига ишонгандим, у ҳам бизни алдади деяпти. Автосалон бошлиғи эса бу ҳақда гап бўлмаган деяпти. Хуллас, автомобиль пулини тўлиқ тўлаб қўйган бўлсам-да, ололмай сарсонман”, — дейди янги машина минишга иштиёқманд фермер.
.jpg)
“Дарё” мазкур ҳолат юзасидан “Aloqabank”нинг Қашқадарё вилояти филали масъули Алишер Мирзаев билан икки маротаба — 2022 йилнинг сентябрь, 2023 йилнинг февраль ойларида мулоқот қилди. Дастлабки мулоқотда масъул ҳақиқатдан ҳам банк ходимларининг хатоси сабаб муаммо юзага келганини, бироқ, мижоз билан келишганини ва айтилган муддатда муаммони ечиши ҳақида маълум қилганди. 2023 йилнинг февраль ойидаги такрорий мулоқотда эса муаммони ҳал этиш кечикканини, буни ОАВда ёритиб жамоатчиликни бундан бохабар қилиш керакмаслигини айтди. Шунингдек, у фермерга берган ваъдасини 2023 йилнинг 28 февраль куни бажаришини маълум қилди. Аммо фермернинг таҳририятга тақдим қилган аудиоёзувида банк бошлиғи мижозига муаммони ҳал этиш қўлидан келмаганини, бу ҳақда бемалол тегишли жойларга, хусусан судга ҳам мурожаат қилиши мумкинлигини таъкидлаган.
Таҳририят банкирлар айби сабаб юзага келган муаммодан АТ “Aloqabank”нинг республикадаги масъулларини ҳам бохабар қилди. “Дарё” журналисти билан мулоқот қилган банк ахборот хизмати раҳбари Зуҳра Юнусова муаммо тез орада ўрганилишини, хатога йўл қўйган банк масъулларига тегишли чора кўрилишини, шунингдек, банк мижозининг муаммоси ҳал этилишини билдирди.
“Дарё” воқеалар ривожини кузатишда давом этади.
Изоҳ (0)