Toshkent shahri ko‘chalarida tamaki chekayotganlarni tanqid qilib, bu Islom diniga zid ekanini fuqarolarga uqtirgan yigit jarimaga tortildi.
Qayd etilishicha, fevral oyida ijtimoiy tarmoqlarda noma’lum shaxs jamoat joyida fuqarolarga tamaki chekish bilan bog‘liq diniy tushuntirishlarni uqtirayotgani aks etgan videoyozuv tarqalgan.
O‘rganishlar jarayonida ushbu shaxs 1999-yilda tug‘ilgan fuqaro A.X. ekani aniqlangan va u jarimaga tortilgan. Fuqaro bilan o‘tkazilgan suhbat davomida o‘zi tanimagan shaxslarga tamaki chekishga nisbatan munosabatini o‘z tashabbusiga ko‘ra shaxsiy diniy qarashlaridan kelib chiqqan holda bildirganligini ma’lum qilgan.
“Konstitusiyaning 25-moddasiga asosan, har kim erkinlik va shaxsiy daxlsizlik, shuningdek 27-moddasiga binoan shaxsiy hayotiga aralashishdan himoyalanish huquqiga ega. Chekish sog‘liq uchun zararli, lekin ushbu jarayonda O‘zbekiston fuqarolarining yuqoridagi kafolatlariga monelik qilish mumkin emas, ayniqsa alohida shaxslarning o‘z tashabbusi orqali va ushbu masalaga diniy tus berish orqali o‘zgalarning shaxsiy hayotga aralashishiga yo‘l qo‘yilmaydi, — deyiladi xabarda.
”Vijdon erkinligi va diniy tashkilotlar to‘g‘risida"gi qonunning 10-moddasiga binoan, mamlakat hududida diniy mazmundagi materiallarni tayyorlash va tarqatish dinshunoslik ekspertizasining ijobiy xulosasi olinganidan keyin amalga oshiriladi. Shu munosabat bilan, A.X.ga nisbatan Ma’muriy javobgarlik to‘g‘risidagi kodeksning 184 prim. 2-moddasiga asosan, BHMning 20 baravari — 6 million so‘m miqdorida jarima jazosi tayinlangan.
Izoh (0)