Sog‘lom turmush tarzini yanada keng targ‘ib etish maqsadida Toshkent hamda O‘zbekistonning 13 ta hududida 12-mart kuni bir vaqtda “Yangi nafas” ommaviy yugurish musobaqalari tashkil etiladi, deb xabar bermoqda O‘zA.
Beshinchi bor tashkil etilayotgan ushbu ommaviy yugurish tadbirlarining bu galgi musobaqalari to‘rtta yo‘nalishda o‘tkaziladi.
Yaʼni:
- 21 kilometrdan iborat yarim marafon;
- 42 kilometr masofani qamrab olgan marafon;
- 10 va 3 kilometrli ommaviy yugurish dasturlari;
- bir kun oldin 12 yoshgacha bo‘lgan bolalar o‘rtasidagi kichik yugurish musobaqalari.
Mazkur musobaqalarda imkoniyati cheklangan, nogironligi mavjud insonlarning qatnashishi uchun ham zarur shart-sharoitlar yaratiladi.
Shu kuni Toshkent shahrida V Toshkent xalqaro marafoni ham bo‘lib o‘tadi. Start va marra hududi Afrosiob va Beshyog‘och ko‘chalari chorrahasida (mo‘ljal – Humo Arena muz saroyi) joylashgan.
Musobaqalar quyidagi masofalarda o‘tkaziladi:
- erkaklar va ayollar o‘rtasida marafon — 42,195 kilometr;
- erkaklar va ayollar o‘rtasida yarim marafon — 21,0975 kilometr;
- erkaklar va ayollar o‘rtasida 10 kilometr masofaga poyga;
- erkaklar va ayollar o‘rtasida 3 klilometr masofaga poyga;
Musobaqalar shaxsiy chempionatda o‘tkaziladi. 10 kilometr va 3 kilometr poygada qatnashuvchilarning yoshi cheklanmagan. Erkaklar va ayollar o‘rtasida 10 kilometr va 3 kilometr masofaga yugurishda 1—3-o‘rinni egallagan ishtirokchilar pul mukofotlari bilan taqdirlanadi.
Navro‘z umumxalq bayramiga bag‘ishlangan “Yangi nafas” yugurish musobaqalari “Toshkent marafoni” sifatida Xalqaro yengil atletika federatsiyasi taqvimidan joy olgan bo‘lib, uning natijalari reyting ko‘rsatkichlarida qayd etiladi. Bu musobaqalarda munosib natijaga erishgan sportchilar nufuzli musobaqalar uchun zarur ballarga ega bo‘ladi, deganidir.
Mutaxassislarning fikricha, 2023-yilda o‘tadigan ommaviy yugurish tadbirlari 25 ming nafarga yaqin qatnashchini qamrab olishi kutilmoqda.
Izoh (0)