Соғлом турмуш тарзини янада кенг тарғиб этиш мақсадида Тошкент ҳамда Ўзбекистоннинг 13 та ҳудудида 12 март куни бир вақтда “Янги нафас” оммавий югуриш мусобақалари ташкил этилади, деб хабар бермоқда ЎзА.
Бешинчи бор ташкил этилаётган ушбу оммавий югуриш тадбирларининг бу галги мусобақалари тўртта йўналишда ўтказилади.
Яъни:
- 21 километрдан иборат ярим марафон;
- 42 километр масофани қамраб олган марафон;
- 10 ва 3 километрли оммавий югуриш дастурлари;
- бир кун олдин 12 ёшгача бўлган болалар ўртасидаги кичик югуриш мусобақалари.
Мазкур мусобақаларда имконияти чекланган, ногиронлиги мавжуд инсонларнинг қатнашиши учун ҳам зарур шарт-шароитлар яратилади.
Шу куни Тошкент шаҳрида V Тошкент халқаро марафони ҳам бўлиб ўтади. Старт ва марра ҳудуди Афросиоб ва Бешёғоч кўчалари чорраҳасида (мўлжал – Ҳумо Арена муз саройи) жойлашган.
Мусобақалар қуйидаги масофаларда ўтказилади:
- эркаклар ва аёллар ўртасида марафон — 42,195 километр;
- эркаклар ва аёллар ўртасида ярим марафон — 21,0975 километр;
- эркаклар ва аёллар ўртасида 10 километр масофага пойга;
- эркаклар ва аёллар ўртасида 3 клилометр масофага пойга;
Мусобақалар шахсий чемпионатда ўтказилади. 10 километр ва 3 километр пойгада қатнашувчиларнинг ёши чекланмаган. Эркаклар ва аёллар ўртасида 10 километр ва 3 километр масофага югуришда 1—3-ўринни эгаллаган иштирокчилар пул мукофотлари билан тақдирланади.
Наврўз умумхалқ байрамига бағишланган “Янги нафас” югуриш мусобақалари “Тошкент марафони” сифатида Халқаро енгил атлетика федерацияси тақвимидан жой олган бўлиб, унинг натижалари рейтинг кўрсаткичларида қайд этилади. Бу мусобақаларда муносиб натижага эришган спортчилар нуфузли мусобақалар учун зарур балларга эга бўлади, деганидир.
Мутахассисларнинг фикрича, 2023 йилда ўтадиган оммавий югуриш тадбирлари 25 минг нафарга яқин қатнашчини қамраб олиши кутилмоқда.
Изоҳ (0)