Uzbekistanʼs club kreativ jamoasi bahorda “O‘zbekistonlik” filmining uchinchi epizodini taqdim etadi.
Odamlarda kelajakka ishonch, o‘z ustida ishlash va yangi marralarni zabt etishga motivatsiya uyg‘otuvchi ushbu filmning avvalgi epizodlari muvaffaqiyat qozongan va ko‘pchilikka maʼqul bo‘lgan edi. Ikkala epizodning YouTube videoportalida ko‘rishlar soni milliondan oshdi. Tomoshabinlar izohlarda film ularda ilmga chanqoqlikni, kelajakka ishonchni uyg‘otgani haqida yozdi.
O‘z oldiga aniq maqsad qo‘yib, unga erishish uchun to‘siqlarga qaramay, harakat qilgan yurtdoshlarimizning hikoyalari ko‘pchilikni ilhomlantiribgina qolmay, muvaffaqiyat va martabaga erishish yo‘lida imkonsiz narsa yo‘qligini ham ko‘rsatdi.
Buni, jumladan, milliarder Ilon Maskning Tesla kompaniyasida faoliyat yuritayotgan va SpaceX bilan hamkorlikda ishlayotgan ikkinchi epizod qahramonlari ham isbotladi. O‘shanda Uzbekistanʼs club kreativ jamoasi tomonidan suratga olingan film ko‘plab olqish va eʼtirofga sazovor bo‘ldi. Aksariyat tomoshabinlar bu kabi ilhomlantiruvchi hikoyalar ko‘proq bo‘lishi kerak, degan fikrni qo‘llab-quvvatladi.
Aynan shuning uchun tez orada, aniqrog‘i, bahor faslida uchinchi epizod ekran yuzini ko‘radi. Unda tomoshabinlar Madina Berdiyeva va Aziz Shohakimov hikoyasi bilan tanishadi.
Madina Berdiyeva Qashqadaryo viloyatida tug‘ilib, voyaga yetgan, Qarshi davlat universiteti xorijiy tillar va biznes-boshqaruvi fakultetlarini tamomlagan, Belgiyadagi Antverpen menejment maktabida IT-arxitektura sohasida magistr darajasini olgan hamda Niderlandiyadagi Delfta texnika universitetida o‘qigan. Bugungi kunda Madina jahonning eng yirik neft-gaz kompaniyalaridan biri – Shellʼda IT-arxitektor sifatida faoliyat yuritmoqda. U yutuq va mag‘lubiyatlardan iborat hayot yo‘li, uni yangi muvaffaqiyatlar sari harakatlantirgan kuch, yaqinlar va qarindoshlarning ishonchi hamda boshqalar haqida so‘zlab beradi.
Dunyoning ko‘plab mamlakatlarida dirijyorligi bilan tanilgan, Strasburg filarmonik orkestrining musiqiy va badiiy rahbari Aziz Shohakimov esa 14 yoshida Alisher Navoiy nomidagi davlat opera va balet teatrida Jorj Bizening “Karmen” operasida dirijyorlik qilgan va Vladimir Spivakov nomidagi Xalqaro xayriya fondi stipendiyasiga ega bo‘lgan, 21 yoshda esa Maler nomidagi nufuzli xalqaro tanlov sovrindoriga aylangan. Hozirgi kunda u Fransiyada yashab, ijod qilmoqda.
“O‘zbekistonlik” filmini suratga olishda Yoshlar ishlari agentligi boshchilidagi ijodiy jamoaga Oriyent Group moliyaviy ko‘mak bermoqda. Uzbekistan Airways rasmiy aviatashuvchi sifatida xizmat ko‘rsatmoqda. O‘zbekistonning Fransiyadagi elchixonasi ham turli tashkiliy masalalarda ijodkorlarga yordam ko‘rsatgan.
Izoh (0)