Afg‘oniston va Pokiston o‘rtasidagi asosiy chegara punkti “Torxam” uch kundan beri yopiq, minglab yuk mashinalari chegarada ushlanib qolgan, deb xabar bermoqda The News nashri.
“Tolibon” hukumati 19-fevral kuni Pokiston va Afg‘oniston o‘rtasidagi sayohatchilar va yuklarning asosiy tranzit davozasi “Torxam”ni yopib qo‘ydi.
“Pokiston va Afg‘oniston o‘rtasidagi chegara punktining yopilishi ikki davlat savdogarlariga zarar yetkazmoqda. Chegaraning ikki tomonida og‘ir yuk mashinalarining uzun navbatlari paydo bo‘ldi. Savdogarlar, ayniqsa, meva-sabzavot singari yangi uzilgan mahsulotlarni yetkazib beruvchilar yo‘qotishlarga uchramoqda, chunki yuk mashinalari so‘nggi uch kundan beri yo‘lda qolib ketgan”, — dedi Pokiston—Afg‘oniston savdo-sanoat palatasi direktori Ziyo-ul-Haq Sarhadiy.
Uning so‘zlariga ko‘ra, ikki tomonda 6 mingtagacha yuk mashinasi to‘xtab qolgan. Har ikki tomon rasmiylari muammoni hal qilish uchun muzokaralar olib borayotganini aytishgan bo‘lsa-da, darvozaning yopilishi sababi to‘liq ma’lum emas.
https://twitter.com/AFIntl_En/status/1628045695969026049Sarhadiyning aytishicha, Afg‘onistondagi aholining aksariyat ehtiyojlarini qondirish uchun Pokiston tovarlari kerak, qolaversa, ko‘plab yuk mashinalari Afg‘onistondan tranzit punkti sifatida Markaziy Osiyoga ham yo‘l olgandi. Boshqa kichikroq chegara o‘tish joylaridan foydalanish varianti yuk mashinalari haydovchilari tomonidan xavfli deb hisoblanmoqda.
Xabarlarga ko‘ra, Pokiston hukumati afg‘onistonlik bemorga hamrohlik qilayotganlardan mamlakatga kirish uchun qonuniy hujjatlarni so‘ragach, Afg‘oniston hukumati “Torxam”dagi chegarani yopib qo‘ygan. Afg‘oniston fuqarolaridan safar uchun hujjat olib yurishni talab qilish, umuman olganda, xavfsizlikni kuchaytirish qarori Peshovarda politsiyaga qilingan terror hujumidan keyin qabul qilingan.
20-fevral kuni “Torxam” atrofida Pokiston harbiylari va “Tolibon” jangchilari o‘rtasida qurolli otishma yuz berdi. Ijtimoiy tarmoqlarda chegarada o‘q ovozlari eshitilib turgan videolar tarqaldi.
Izoh (0)