Latviya Rossiya ustidan maxsus tribunalda Ukrainaning advokati bo‘lishga tayyor. Bu haqda Ukraina Oliy Radasi raisi o‘rinbosari Elena Kondratyuk ma’lum qildi.
Kondratyukning so‘zlariga ko‘ra, u ushbu masalani Latviya adliya vaziri Inessa Libina-Egner bilan uchrashuvda muhokama qilgan. “Adliya vaziri Latviya bu masalada Ukrainaning advokati bo‘lishiga ishontirdi”, — deb yozadi Kondratyuk Facebook sahifasida.
Bundan tashqari, yig‘ilishda “muzlatilgan Rossiya aktivlarini Ukrainani tiklash maqsadlarida musodara qilish”ni huquqiy qo‘llab-quvvatlash masalasi ko‘tarildi, deya qo‘shimcha qilgan Oliy Rada raisi o‘rinbosari.
Noyabr oyi oxirida Yevrokomissiya rahbari Ursula fon der Lyayen BMT ko‘magida Rossiyaning Ukrainadagi harakatlarini tergov qilish va jinoiy javobgarlikka tortish uchun ixtisoslashtirilgan sud yaratish zarurligini ma’lum qilgandi. Uning aytishicha, Rossiya Ukrainaga yetkazilgan moliyaviy zararni ham qoplashi kerak, uning o‘sha paytdagi hisob-kitoblariga ko‘ra, bu 600 milliard yevrodan oshgan.
O‘sha kuni Fransiya Tashqi ishlar vazirligi Bryussel va Kiyev bilan birgalikda Rossiyaning Ukrainaga qarshi bosqinchilik jinoyati bo‘yicha Maxsus tribunal yaratish ustida ish boshlanganini e’lon qildi.
Ayni vaqtda Yevropa Ittifoqining anonim rasmiylari The Washington Post bilan suhbatda maxsus tribunal yaratish taklifini BMT Xavfsizlik Kengashidan o‘tkazib bo‘lmasligi (Rossiya u yerda veto huquqiga ega), ammo bu BMT Bosh Assambleyasi orqali amalga oshirilishi mumkinligi haqida fikr bildirgan.
Izoh (0)