Ekvadorda Birlashgan Millatlar Tashkilotining Narkotiklar va jinoyatchilik bo‘yicha boshqarmasi (UNODC) ko‘magida kokain mahsulotlarini qurilish materiallariga aylantirish boshlandi. Bu haqda Reuters xabar bermoqda.
Buning uchun xavfli chiqindilar germitik va noreaktiv materiallardan tayyorlangan idishlarga utilizatsiya qilinayotgan paytda inkapsulyatsiya usuli qo‘llanadi.
Musodara qilingan kokain bloklari boshqa chiqindilar (jumladan, shisha, yaroqlilik muddati o‘tgan dori vositalari va hatto neft chiqindilari) bilan birga chiqindini qayta ishlash zavodida maydalanadi, so‘ngra kukun sement, qum va suv bilan aralashtirib beton hosil qilinadi. Undan zavod ombori uchun poydevor qo‘yiladi — aynan qaysi omborlar uchun ishlatilishini rasmiylar xavfsizlik nuqtayi nazaridan oshkor qilmayapti. Ayni paytda qurilish uchun 2021-yildan 2022-yilgacha musodara qilingan 350 tonnaga yaqin maydalangan kokain va prekursorlardan foydalanilgan.
“Bir tonna kokainni yoqish uchun 12 soatgacha vaqt ketishi mumkin, shuncha miqdordagi kokainni inkapsulyatsiya qilish esa uch soatdan kamroq vaqt oladi”, — dedi narkotiklar bo‘limi rahbari Pablo Ramires. “Jarayon arzonroq, kamroq vaqt talab etadi va atrof-muhitga ta’sir qilmaydi”.
Ekvador prezidenti Gilermo Lasso mamlakat orqali kokainni AQSH va Yevropaga o‘tkazayotgan narkoto‘dalarga qarshi kurashni kuchaytirgan. Politsiya ma’lumotlariga ko‘ra, 2021-yilda mamlakatda musodara qilingan giyohvand moddalar miqdori avvalgi yilga nisbatan qariyb ikki baravar oshgan (210 tonnadan ko‘p) va ularning aksariyati — kokain. Odatda giyohvand moddalarni yoqadigan pechlar hozir buncha miqdorga dosh berolmaydi, dedi Ekvador ichki ishlar vaziri o‘rinbosari Edmundo Mera.
2022-yilning dekabr oyida Bloomberg “kokainning oltin davri” kelayotgani haqida yozgandi. Bunga Kolumbiyada giyohvand moddalar ishlab chiqarish rekord darajaga yetgani, shuningdek, narkokartellar giyohvand moddalarni yashirish va ularni butun dunyo bo‘ylab ko‘p miqdorda tashishda mohirlashayotgani sabab bo‘lmoqda.
Izoh (0)