Ijtimoiy tarmoqlarda yerini undan tortib olishayotganidan norozi fuqaroning murojaati e’lon qilindi. Kadastr agentligi holatga munosabat bildirib, tarmoq foydalanuvchilariga asl holatni bilmay turib xulosa qilishga shoshilmaslikni maslahat berdi.
Qayd etilishicha, da’vo qilinayotgan yer maydoni Toshkent shahri Shayxontohur tumani “Ibn Sino” MFY Toshkent halqa avtomobil yo‘li ko‘chasi manzilida joylashgan. “Yerimni tortib olishyapti” deb davo qilayotgan fuqaro N.A. aslida ushbu yerni 2017-yildan buyon o‘zboshimchalik bilan egallab, noqonuniy foydalanib kelgan. Boz ustiga, mazkur yerda maysa (gazon) yetishtirib sotish amaliyotini yo‘lga qo‘ygan.
O‘tgan davr davomida davlatga tegishli bo‘lgan yer maydonidan foydalanib, daromad topib kelgan bo‘lsa-da, ushbu davrlar uchun yer solig‘i to‘lanmagan. Qolaversa, ushbu yer maydoni nafaqat fuqaro N.A.ga, balki muqaddam biror-bir shaxsga mulk yoki ijara huquqi asosida foydalanishga berilmagan. Yer maydoni tuman hokimligi zaxirasida bo‘lgan.
Mazkur yer Toshkent shahar hokimining 2022-yildagi tegishli qarori bilan Shayxontohur tumani aholi bandligiga ko‘maklashish markaziga “Vaqtinchalik ishlarni tashkil etish byurosi”ni qurish uchun doimiy foydalanish huquqi bilan qonun doirasida ajratib berilgan.
“Bu esa ushbu yerda o‘zining rejalari bo‘lgan fuqaro N.A.ga yoqmagan va natijada ijtimoiy tarmoqlarga mening yerimni tortib olishyapti, qabilidagi davlat idoralari va mansabdorlarini obro‘sizlantirish kayfiyatiga ega bo‘lgan videomurojaatni yo‘llagan”, — deyiladi xabarda.
Ta’kidlanishicha, Ma’muriy javobgarlik to‘g‘risidagi kodeksning 60-moddasida yer uchastkalarini o‘zboshimchalik bilan egallab olganlik, shu jumladan, ushbu yer uchastkalariga nisbatan qonuniy huquqlari mavjud bo‘lmagan holda ulardan foydalanganlik uchun ma’muriy javobgarlik belgilangan. Ushbu turdagi huquqbuzarlik uchun fuqaroga BHMning 25 baravari miqdorida jarima solinishi mumkin.
“Qonunchiligimizda zaxiradagi yerlarni bemalol egallab olish, undan istalgancha foydalanish mumkin degan tushunchalar aslo yo‘q. Zero qonunchiligimizda yer ajratishning qonuniy va shaffof mexanizmlari belgilangan. Yer umummilliy boylikdir, undan oqilona foydalanish zarur va u davlat muhofazasidadir”, — deyiladi agentlik xabarida.
Izoh (0)