“Ukrainadan demokratik yo‘ldan qaytmaslik talab qilinmoqda” — Navbahor Imomova AQSH yordamlari evaziga rasmiy Kiyevdan nimalar kutayotgani haqida

“Amerika ovozi” teleradiosi muxbiri, jurnalist Navbahor Imomova “Daryo” nashriga bergan intervyusida AQSHning Ukrainaga berayotgan yordamlari ortida qanday shartlar borligi haqida gapirdi.  

Navbahor Imomovaning aytishicha, AQSHning Ukrainaga berayotgan yordamlari evaziga bir qator shartlari bor.

“Bu shartlar ochiq. Yaʼni Ukraina demokratik yo‘ldan qaytmasligi, hukumati hisobdor bo‘lishi kerak. Mamlakatda g‘arbga xos qarorlar qabul qilinishi lozim, degan shartlar bor. Bu yerda Amerika siyosatchilari bizning manfaatlardan kelib chiqqan qarorlar qabul qil, demaydi, lekin ularning nazarida Ukraina allaqachon shunday qarorlar qabul qila oladi. Ukraina g‘arbga intilmoqda. Eng muhimi, demokratik dunyoning ajralmas qismiga aylanish harakatida.

Hozirgi Ukraina avtoritar siyosat va diktatura boshqaruvlariga qarshi. Atrofdagi davlatlardan farqli bir jamiyatga, bir tuzumga aylanmoqchi. Xususan, Rossiyadan farqli bo‘lishga urinyapti. Va Rossiyaning nazorati va bosimlaridan qutulishga harakat qilmoqda. Ukraina uzoq muddatda NATOga kirishi mumkin. Yaqin muddatda Yevropa ittifoqiga qo‘shilish uchun harakatlarini quvvatlashi kerak. NATO yaqin orada Shvetsiya va Finlyandiya hisobiga kengayar ekan, undan keyin Ukrainani olib kirish harakatlari bo‘ladi. Vashingtonda Ukraina tarafdorlari, siyosiy doiralar mana shunday targ‘ibot olib boradi”, – dedi jurnalist.

Navbahor Imomovaning qo‘shimcha qilishicha, kollektiv g‘arb tomonidan Ukrainani qayta qurish haqida ham ko‘p gapirilmoqda.

“Ukrainani qayta qurish borasida rejalar mavjud. G‘arb bu yo‘lda yangicha “Jorj Marshall” rejasi bilan chiqadi. “Buni amalga oshirish uchun Ukraina yulg‘ichlikka qarshi kurashish kerak, tizim shaffoflanishi, inson huquqlari hurmat qilinishi, qonun ustuvor bo‘lishi kerak. Siyosiy organlar bir-biridan mustaqil bo‘lishi lozim. Bunda eng asosiy ishni Ukraina xalqining o‘zi qiladi. Biz Ukraina xalqini quvvatlaymiz. Bu yo‘lda biz aniq natijalar ko‘rishimiz kerak”, degan talablar bor. Bu shartlar har kuni yangramasa-da, lekin albatta bor”, – dedi “Amerika ovozi” muxbiri.

Avvalroq Navbahor Imomova AQSHda Baydenning tandiqchilari – respublikachilar Vakillar palatasida ko‘pchilik o‘ringa ega bo‘lgani sabab Oq uy uchun Ukrainaga yordam takliflarini maʼqullatish oldingiga qaraganda qiyinlashganini aytgandi.