Namanganlik 70 yoshli Murodjon Qosimovning qahraton qish chillasida Norin daryosida cho‘milayotgani aks etgan videolavha “Daryo”da eʼlon qilinganidan so‘ng, otaxon internetda maʼlum darajadagi mashhurlikka erishdi. “Daryo” muxbiri Azizbek Abduvaliyev Namangan viloyatining Uchqo‘rg‘on tumanida bo‘lib, barchani hayratga solgan otaxon bilan suhbatlashdi.
O‘zbekistonning eng yaxshi tergovchisi
O‘zim asli oltiariqlikman. 1984-yili Samarqand davlat universitetining huquqshunoslik fakultetini tamomlaganimdan keyin yo‘llanma bilan Namanganga, Uchqo‘rg‘on tumaniga yuborishgan. 22 yil davomida ichki ishlar tizimida tergovchi bo‘lib ishladim, tergov bo‘linmasi boshlig‘i lavozimigacha ko‘tarildim. Mayor unvonida nafaqaga chiqdim.
Bu yerga kelganimda hech kimni tanimasdim. Asta-sekin do‘st-og‘ayni orttirdim, quda-andali bo‘ldim. Shu bilan Namanganda qolib ketdim. Lekin to‘y-maʼrakada Farg‘onaga borishni kanda qilmayman, qarindosh-urug‘larim o‘sha yerda-da baribir.
Ko‘p jinoyatlarni ochishda ishtirok etdim, ammo shuncha yil ishlab biror kishining bo‘yniga noto‘g‘ri ayb qo‘ymadim, qilmishidan ortig‘ini hujjatlarga tirkamadim. Shu uchun bo‘lsa kerak, meni baʼzan “advokat tergovchi” ham deyishardi.
Tergovchi jinoyat ishi bo‘yicha tayyorlagan materiallar to‘plami qaytmasligi uning faoliyatidagi eng asosiy mezon hisoblanadi. Shuncha yil ishlab, atigi bitta “delo” ortga qaytganini eslayman, u ham menga bog‘liq bo‘lmagan sabablarga ko‘ra. 1986-yili bo‘lsa kerak, o‘sha paytdagi vazir imzosi bilan “O‘zbekiston IIVning eng yaxshi tergovchisi” degan tashakkurnomani ham olganman.
Hozir ham ko‘cha-ko‘yda men bir paytlar so‘roq qilgan sobiq mahkumlarni ko‘rib qolaman. Ularning yuziga tik qaray olaman, hech biri “meni nohaq ayblagansiz” degan taʼna-dashnomni aytmagan. Aksincha, “vaqtida yomon yo‘ldan qaytgan ekanmiz, sizga rahmat” deyishgan.
“Qish chillasi daryoda cho‘milishning ayni mavridi”
Rahmatli otam chayir va chapani odam edi. Kurash tushish uchun maydonga chiqsa, olishganini yiqitmay qo‘ymasdi. Bu narsa menga ham o‘tgan. Turnikda tortilish, gimnastika, tosh ko‘tarish bilan shug‘ullanganman, futbol, sambo, karatega qiziqqanman. O‘z paytida tosh ko‘tarish bo‘yicha Farg‘ona viloyati chempioni ham bo‘lganman. Gavdam, mushaklarimni ko‘rgan odam havas qilardi, uncha-munchasi yonimga yaqinlashgani hayiqardi.
Harbiy xizmatni Rossiyaning Kemerevo viloyati, Yurga shahrida o‘tadim. O‘sha yerdan oqib o‘tuvchi Tom daryosida cho‘milardik. Hatto qishda ham. Yoshman, qiziqqonman, baquvvatman. Shu-shu bu narsa odat tusiga kirdi. O‘zbekistonga qaytgandan keyin ham cho‘milishni tark etmadim. Sindirilgan shisha ustida yotish, teridan qon chiqarmay ignani o‘tkazish kabi antiqa “hunar”larim ham bor.
Hozir ham qish chillasida, 40 kun davomida daryoda cho‘milaman. Aslida qish chillasi daryoda cho‘milishning ayni mavridi: suv toza, odam yo‘q, faqat buning uchun yaxshigina tayyorgarlik kerak. Avval badantarbiya qilib, mushaklarimni qizdirib olaman, keyin suvga sho‘ng‘iyman. Kuniga 8-10 kilometr velosipedda yurib, masjidga qatnayman, qor yog‘gan paytlar bo‘lsa, piyoda boraman yoki yuguraman. To masjidga yetguncha bilgan sura va oyatlarni qaytarib boraman, safning oldidan o‘rin egallayman.
Maqtanchoq chol demanglar, hozir 70 yoshimda ham 70 kiloli qopni bemalol ko‘tarib, bir joydan ikkinchi yerga olaman. Shtanga ko‘taraman, turnikda tortilaman. Umuman, erkak kishi shu so‘zga munosib bo‘lishi, o‘zi, oilasi, yurti, dinini himoya qilishga qodir bo‘lishi kerak, deb hisoblayman.
Bir yilda bir milliard topish imkoni
O‘zim asli oltiariqlik bo‘lganim uchun dehqonchilikka qiziqish qondan o‘tgan. Toshloq bo‘lsa ham, uch gektar yerim bor. Shu yerda qulupnay yetishtiraman, kurka-g‘oz, tovuq, asalari, baliq boqaman. Qulupnayni 15-iyundan boshlab ekishni yo‘lga qo‘ydim. Bu ham dehqonchilikda yangilik. Kuzning oxiriga borib, hosilini olishni boshlayman, bir yilda uch martagacha hosil ko‘tarish mumkin. Keyin ko‘chatini sotaman. Mavsum paytlari mahalladan 30-40 kishini ishlataman, ko‘chatalarimni hatto qulupnaychilikning piri bo‘lgan qayqiliklar ham olib ketishadi.
Sinfdosh do‘stim Vahobjon Oripov bilan qulupnay yetishtirishning innovatsion usulini o‘ylab topdik. Bu usul yordamida 10 sotix joyda 50 sotix qulupnayning hosilini olsa bo‘ladi, ularning orasiga sarimsoqpiyoz ham ekiladi. Buning uchun issiqxonada ekinlarni qavat-qilib joylashtirish, meʼyorida harorat, tomchilatib suv, o‘g‘itini berib turish kerak. Agar bu loyihani amalga oshirish uchun menga 1 milliard so‘m mablag‘ berilsa, bir yildayoq oshig‘i bilan qaytarishga ko‘zim yetadi. Buni boshqalarga o‘rgatishga ham tayyorman.
Xudoga shukr, to‘rt nafar farzandim, 16 nafar nabiram, ikki nafar evaram bor. Eng katta orzuyim Haj yoki Umra ziyoratini ado etib qaytish. Lekin buni birinchi galda besh nafar opa-singlim va turmush o‘rtog‘imdan boshlamoqchiman. Ular turib, safarga otlanish men uchun uyat bo‘lsa kerak...
Izoh (0)