Ижтимоий тармоқларда ерини ундан тортиб олишаётганидан норози фуқаронинг мурожаати эълон қилинди. Кадастр агентлиги ҳолатга муносабат билдириб, тармоқ фойдаланувчиларига асл ҳолатни билмай туриб хулоса қилишга шошилмасликни маслаҳат берди.
Қайд этилишича, даъво қилинаётган ер майдони Тошкент шаҳри Шайхонтоҳур тумани “Ибн Сино” МФЙ Тошкент ҳалқа автомобиль йўли кўчаси манзилида жойлашган. “Еримни тортиб олишяпти” деб даво қилаётган фуқаро Н.А. аслида ушбу ерни 2017 йилдан буён ўзбошимчалик билан эгаллаб, ноқонуний фойдаланиб келган. Боз устига, мазкур ерда майса (газон) етиштириб сотиш амалиётини йўлга қўйган.
Ўтган давр давомида давлатга тегишли бўлган ер майдонидан фойдаланиб, даромад топиб келган бўлса-да, ушбу даврлар учун ер солиғи тўланмаган. Қолаверса, ушбу ер майдони нафақат фуқаро Н.А.га, балки муқаддам бирор-бир шахсга мулк ёки ижара ҳуқуқи асосида фойдаланишга берилмаган. Ер майдони туман ҳокимлиги захирасида бўлган.
Мазкур ер Тошкент шаҳар ҳокимининг 2022 йилдаги тегишли қарори билан Шайхонтоҳур тумани аҳоли бандлигига кўмаклашиш марказига “Вақтинчалик ишларни ташкил этиш бюроси”ни қуриш учун доимий фойдаланиш ҳуқуқи билан қонун доирасида ажратиб берилган.
“Бу эса ушбу ерда ўзининг режалари бўлган фуқаро Н.А.га ёқмаган ва натижада ижтимоий тармоқларга менинг еримни тортиб олишяпти, қабилидаги давлат идоралари ва мансабдорларини обрўсизлантириш кайфиятига эга бўлган видеомурожаатни йўллаган”, — дейилади хабарда.
Таъкидланишича, Маъмурий жавобгарлик тўғрисидаги кодекснинг 60-моддасида ер участкаларини ўзбошимчалик билан эгаллаб олганлик, шу жумладан, ушбу ер участкаларига нисбатан қонуний ҳуқуқлари мавжуд бўлмаган ҳолда улардан фойдаланганлик учун маъмурий жавобгарлик белгиланган. Ушбу турдаги ҳуқуқбузарлик учун фуқарога БҲМнинг 25 баравари миқдорида жарима солиниши мумкин.
“Қонунчилигимизда захирадаги ерларни бемалол эгаллаб олиш, ундан исталганча фойдаланиш мумкин деган тушунчалар асло йўқ. Зеро қонунчилигимизда ер ажратишнинг қонуний ва шаффоф механизмлари белгиланган. Ер умуммиллий бойликдир, ундан оқилона фойдаланиш зарур ва у давлат муҳофазасидадир”, — дейилади агентлик хабарида.
Изоҳ (0)