Qashqadaryoda qayt qilish, ovqat hazm qilish tizimining ishlamasligi bilan shifoxonaga keltirilgan 13 kunlik chaqaloqda murakkab jarrohlik amaliyoti o‘tkazildi. Bu haqda “Daryo”ga viloyat Sog‘liqni saqlash boshqarmasi axborot xizmati maʼlum qildi.
Qayd etilishicha, Chiroqchi tumanidan viloyat bolalar ko‘p tarmoqli tibbiyot markaziga olib kelingan 13 kunlik chaqaloqda tug‘ma yuqori ichak tutilishi kuzatilgan. Shuningdek, unda oshqozon osti bezi o‘ralib, halqalangani sababli ingichka ichak qisilib, sut oshqozondan ingichka ichakka o‘tmay qolgan. Oshqozon ikki barobar kattalashgan.
“Murakkkab jarrohlik amaliyoti sababli ingichka ichak oshqozonga ulandi. Mutaxassislar fikricha, qalamdan ham ingichka bo‘lgan ichakni ulash jarrohdan katta mahorat talab etadi. Chaqaloqda o‘tkazilgan maxsus amaliyot Turkiyada malaka oshirgan mohir jarroh Bahrom Shukurov va uning shogirdlari — Abdurahmon Botirov hamda Nilufar Bahorova tomonidan bajarildi. Ayni paytda go‘dakning ahvoli yaxshi”, — deydi boshqarma axborot xizmati rahbari Nuriddin Egamov.
Izoh (0)