O‘zbekistonda endi davlat korxonalari kuzatuv kengashiga a’zolarni saylashda barcha aksiyadorlar ovoz beradi

AOKAda o‘tkazilgan brifingda Davlat aktivlarini boshqarish agentligi boshqarma boshlig‘i Sharofiddin Ahmedov “Korporativ boshqaruv tizimini yanada takomillashtirish munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunida ko‘zda tutilgan masalalar tahlili yuzasidan ma’lumot berdi.

Qayd etilishicha, hozirda davlat ishtirokidagi 57 ta korxonaning kuzatuv kengashi tarkibiga 86 ta (atigi 4 foiz) mustaqil a’zolar kiritilgan. Agentlik keyingi 3 yilda davlat ishtirokidagi korxonalarning kuzatuv kengashi tarkibidagi mustaqil a’zolarni kamida 30 foizga yetkazishi ko‘zda tutilgan.

Endi davlat ishtirokidagi korxonalarning kuzatuv kengashi tarkibidagi mustaqil a’zolarni saylashda barcha aksiyadorlar ovoz berishi mumkin bo‘ladi.

Joriy yil 18-yanvardagi qonunga ko‘ra, “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi va “Mas’uliyati cheklangan hamda qo‘shimcha mas’uliyatli jamiyatlar to‘g‘risida”gi qonunlarga o‘zgartirish va qo‘shimchalar kiritilgan. Ya’ni endilikda:

• Kuzatuv kengashi tarkibiga saylangan mustaqil a’zolarning reyestri yuritiladi hamda korxona rasmiy veb-saytlarida e’lon qilinadi;
• Mustaqil a’zolikka nomzodlar kuzatuv kengashi tomonidan tanlov asosida tanlab olinib, umumiy yig‘ilishga kiritiladi.