Қашқадарёда қайт қилиш, овқат ҳазм қилиш тизимининг ишламаслиги билан шифохонага келтирилган 13 кунлик чақалоқда мураккаб жарроҳлик амалиёти ўтказилди. Бу ҳақда “Дарё”га вилоят Соғлиқни сақлаш бошқармаси ахборот хизмати маълум қилди.
Қайд этилишича, Чироқчи туманидан вилоят болалар кўп тармоқли тиббиёт марказига олиб келинган 13 кунлик чақалоқда туғма юқори ичак тутилиши кузатилган. Шунингдек, унда ошқозон ости бези ўралиб, ҳалқалангани сабабли ингичка ичак қисилиб, сут ошқозондан ингичка ичакка ўтмай қолган. Ошқозон икки баробар катталашган.
“Муракккаб жарроҳлик амалиёти сабабли ингичка ичак ошқозонга уланди. Мутахассислар фикрича, қаламдан ҳам ингичка бўлган ичакни улаш жарроҳдан катта маҳорат талаб этади. Чақалоқда ўтказилган махсус амалиёт Туркияда малака оширган моҳир жарроҳ Баҳром Шукуров ва унинг шогирдлари — Абдураҳмон Ботиров ҳамда Нилуфар Баҳорова томонидан бажарилди. Айни пайтда гўдакнинг аҳволи яхши”, — дейди бошқарма ахборот хизмати раҳбари Нуриддин Эгамов.
Изоҳ (0)