“Ўзбекистон ва Миср ўртасида фойдаланилмаган улкан салоҳият мавжуд” — Обид Ҳакимов

Иқтисодий тадқиқотлар ва ислоҳотлар маркази директори Обид Ҳакимов Ўзбекистон ва Миср ўртасида фойдаланилмаган улкан салоҳият мавжудлигини айтди. Бу ҳақда марказнинг жамоатчилик билан алоқалар шўбаси хабар берди.

Қайд этилишича, Обид Ҳакимов 18 февраль куни Қоҳирада Ўзбекистон ва Миср ўртасидаги иқтисодий ҳамкорликни янада ривожлантиришнинг истиқболли йўналишларига бағишланган давра суҳбатида сўнгги йилларда иқтисодий соҳада Ўзбекистон—Миср муносабатлари фаол ривожланиш босқичига ўтганини таъкидлади. 2017 йилдан буён ўзаро савдо ва сармоявий ҳамкорлик фаоллашиб, ушбу йўналишга устувор аҳамият берилаётганини, Миср президенти ас-Сисининг 2018 йил 4 сентябрда Ўзбекистонга расмий ташрифи якунлари бўйича қиймати 483 миллион долларлик савдо ва сармоявий келишувларга эришилганини қайд этди.

Марказ ҳисоб-китобларига кўра, Ўзбекистон ва Миср ўртасидаги товар айирбошлаш ҳажми сўнгги беш йилда уч баробардан ортиқ, 2017 йилда қарийб 10 миллион доллардан 2022 йилда 30,5 миллион долларгача ошди. Ўзбекистоннинг Мисрга экспорти 16 баробарга ошган.

Ўзбекистоннинг Мисрга экспорти таркибига тўқимачилик маҳсулотлари, транспорт ускуналари ва хизматлари, шу жумладан ҳаво транспорти хизматлари киради. Ўзбекистоннинг 2022 йилда Мисрдан амалга оширилган импорт таркибига озиқ-овқат маҳсулотлари, кимё маҳсулотлари, машина ва транспорт ускуналари ва хизматлар ўрин олган.

Марказ директорининг сўзларига кўра, инвестицион соҳадаги ҳамкорлик ҳам фаол ривожланмоқда. Хусусан, Ўзбекистонда мисрлик ишбилармонларнинг капитали иштирокида 29 та қўшма корхона фаолият кўрсатмоқда. Мисрнинг “Солифар” компанияси билан ҳамкорликда Тошкент вилоятидаги “Бўстонлиқ-фарм” ЭИЗда фармацевтика соҳасида (қиймати 20 миллион доллар) ишлаб чиқариш лойиҳасини амалга ошириш бўйича ишлар олиб борилмоқда. Қашқадарё вилоятида гепатит C препаратларини ишлаб чиқаришни йўлга қўйиш бўйича (1,4 миллион доллар) Мисрнинг One World Pharma компанияси билан ишлар олиб борилмоқда. Каpo Аgri компанияси билан Наманган вилоятида балиқчилик соҳасидаги лойиҳа бўйича музокаралар ўтказилди.

Шу билан бирга, Ўзбекистон ва Миср ўртасидаги ўзаро савдо ва инвестицион кўрсаткичлари ҳажми тўғрисидаги маълумотлар таҳлили натижасида ушбу соҳада ҳали фойдаланилмаган улкан салоҳият мавжудги алоҳида қайд этиб ўтилди.

Маълумот учун, Шавкат Мирзиёев Миср президенти Абдулфаттоҳ Ас-Сисининг таклифига биноан 20—21 февраль кунлари расмий ташриф билан ушбу мамлакатда бўлади. Расмий ташриф арафасида Ўзбекистон—Миср бизнес форуми бўлиб ўтди.  Бизнес-форум якунлари бўйича кимё, энергетика, тоғ-кон саноати, тўқимачилик, чарм-поябзал ва озиқ-овқат маҳсулотлари маҳсулотлари ишлаб чиқариш, саноат зоналарини ривожлантириш, инфратузилмани ривожлантириш, қурилиш, фармацевтика каби соҳаларда қўшма лойиҳаларни амалга ошириш юзасидан келишувларга эришилди.