Ijtimoiy tarmoqlarda oliy ta’lim, fan va innovatsiyalar vaziri tomonidan OTMlarda talabalarni uch guruhga ajratish bo‘yicha rektorlarga shoshilinch topshiriq berilgani haqida xabarlar tarqaldi. Holatga vazirlik rasmiy munosabat bildirdi.
Ta’lim bo‘yicha ekspert Komil Jalilovning yozishicha, vazirlikning 14-fevralda barcha OTM rektorlari va filial direktorlariga “Shoshilinch“ grifi bilan yuborgan, 3 kun muddatda bajarilishi so‘ralgan topshirig‘ida, barcha talabalarni o‘rganib, uch guruh ro‘yxatini shakllantirish belgilangan:
- jinoyatchilikka moyil talabalar;
- yot g‘oyalar ta’siriga tushish arafasidagi talabalar;
- tartib qoidalarga rioya etmaydigan talabalar.
Bundan tashqari, xatda boshqa “qiziq” topshiriqlar ham bor:
- yoshlar o‘rtasida paydo bo‘layotgan yomon illatlardan ogoh qilish maqsadida taʼsirchan qisqa hikoyalar nashr qilish, OTMlarda spektakllar namoyish etish;
- quyosh panellarini o‘z mablag‘lari hisobidan o‘rnatish, isitish tizimlarini (kotyollarni) ko‘mirga o‘tkazish, muqobil energetikani joriy etish bo‘yicha dastur ishlab chiqish;
- OTMning “sharaf” kodeksini yaratish, xodimlarning ijtimoiy tarmoqlardagi faoliyati bo‘yicha eʼlon qilinayotgan maqola va fikrlarga tizim sha’nini himoya qilish bo‘yicha o‘z fikrlari bilan ishtirok etishi bo‘yicha tushuntirishlar olib borish.
Oliy ta’lim, fan va innovatsiyalar vazirligi xabariga ko‘ra, 14-fevral kuni OTM va filiallar rahbarlariga jo‘natilgan xat vazirlik tomonidan muntazam ravishda o‘tkaziluvchi onlayn yig‘ilishda bildirilgan fikr va mulohazalardan kelib chiqib berilgan topshiriqdir. Bu yozma topshiriqlar rektorlar bilan muhokama qilinib, avvaldan kelishib chiqarilgan va ular OTMlar ichki tartib-qoidalariga aloqador.
“OTM tartib-qoidalariga amal qilmaydigan yoki buzgan talabalar ro‘yxatini tuzishdan maqsad talabalarning ma’naviy-moddiy muammolarini bartaraf etish, iqtidorini ro‘yobga chiqarishga ko‘maklashish, talabalarning vaqti va imkoniyatlarini bilim olishga yo‘naltirish, talabalar va murabbiylar orasida do‘stlik muhitini yaratishdir”, — deya izoh bergan vazirlik berilgan topshiriqlardan biriga.
Qayd etilishicha, xatda iqtidorli talabalarning ro‘yxatini shakllantirib, vazirlik va OTMning rahbariyati hamda professor-o‘qituvchilariga biriktirish topshirig‘i ham berilgan. Iqtidorli talabalar soni OTM ichki tartib-qoidalarini tushunib yetmagan talabalardan ko‘proqni tashkil etadi va iqtidorli yoshlarning muammolarini o‘rganish ham alohida yondashuvni talab etadi. Maqsad — iqtidorli talabalarning muammolarini eshitish, ularning g‘oya va takliflariga muntazam yo‘nalish berib turishdir.
“Shunday qilib, OTM rahbarlari va professor-o‘qituvchilar alohida e’tibor talab etiladigan talabalar bilan individual ishlashlari nazarda tutilgan. Bunda vazirlik rahbarlarining ham talabalar bilan muloqotlari yo‘lga qo‘yiladi”, — deyiladi munosabatda.
OTMlarda elektr energiya bilan taʼminlaydigan quyosh panellarini o‘z mablag‘lari hisobidan o‘rnatish ishlari yuzasidan topshiriq bo‘yicha quyidagicha izoh berilgan:
“Bu topshiriq hozirgi kundagi global muammo — energiya taqchilligi masalasi ijobiy hal etilib, talabalarning qulay o‘qib, dam olishlari uchun sharoit yaratishga qaratilgan. Topshiriq hozirda OTMlar tomonidan bajarilmoqda va bu bo‘yicha vazirlikning dayjesti eʼlon qilib borilmoqda”.
“Yana bir topshiriqda tizim to‘g‘risida berilayotgan fikrlar, sohadagi yutuq va kamchiliklar haqida xolis fikr bildirish maqsadida talabalarni OAVda yanada faolroq bo‘lishga chaqirish, hodisa va voqelikka bir tomonlama qarashning oldini olish yuzasidan tushuntirishlar olib borish maqsad qilingan. Bunda tizim sha’nini himoya qilish deganda, albatta, faqat ijobiy emas, balki xolis, asoslangan tanqidiy fikrni ilgari surish ham tushuniladi”, — deya izoh bergan vazirlik.
Qayd etilishicha, yoshlar o‘rtasida paydo bo‘layotgan yomon illatlardan ogoh qilish maqsadida taʼsirchan qisqa hikoyalar nashr qilish nazarda tutilsin” degan topshiriq ham kontekstdan uzib olingan. Oliy taʼlim, fan va innovatsiyalar vazirligi tomonidan hozirda shunday hikoyalar to‘plami nashr etishga tayyorlandi va ular OTMlarning ijtimoiy tarmoqlardagi sahifalari va kanallarida e’lon qilinishi nazarda tutilgan.
“Sharaf kodeksiga keladigan bo‘lsak, bunda har bir OTM talabalari va o‘qituvchilarini birlashtiruvchi ramzlarni, qadriyatlarni ishlab chiqish, ilmiy tadqiqotlarga undovchi yo‘nalishlarni belgilash bo‘yicha takliflar tayyorlash nazarda tutilgan. Ushbu kodeks talabalar, pedagoglar, professorlar va bitiruvchilarni o‘z oliy taʼlim muassasalaridan g‘ururlanishlariga, maslakdosh bo‘lishlariga xizmat qiladi”, — deya tushuntirish bergan oliy ta’lim, fan va innovatsiyalar vazirligi.
Izoh (0)