Ижтимоий тармоқларда олий таълим, фан ва инновациялар вазири томонидан ОТМларда талабаларни уч гуруҳга ажратиш бўйича ректорларга шошилинч топшириқ берилгани ҳақида хабарлар тарқалди. Ҳолатга вазирлик расмий муносабат билдирди.
Таълим бўйича эксперт Комил Жалиловнинг ёзишича, вазирликнинг 14 февралда барча ОТМ ректорлари ва филиал директорларига “Шошилинч“ грифи билан юборган, 3 кун муддатда бажарилиши сўралган топшириғида, барча талабаларни ўрганиб, уч гуруҳ рўйхатини шакллантириш белгиланган:
- жиноятчиликка мойил талабалар;
- ёт ғоялар таъсирига тушиш арафасидаги талабалар;
- тартиб қоидаларга риоя этмайдиган талабалар.
Бундан ташқари, хатда бошқа “қизиқ” топшириқлар ҳам бор:
- ёшлар ўртасида пайдо бўлаётган ёмон иллатлардан огоҳ қилиш мақсадида таъсирчан қисқа ҳикоялар нашр қилиш, ОТМларда спектакллар намойиш этиш;
- қуёш панелларини ўз маблағлари ҳисобидан ўрнатиш, иситиш тизимларини (котёлларни) кўмирга ўтказиш, муқобил энергетикани жорий этиш бўйича дастур ишлаб чиқиш;
- ОТМнинг “шараф” кодексини яратиш, ходимларнинг ижтимоий тармоқлардаги фаолияти бўйича эълон қилинаётган мақола ва фикрларга тизим шаънини ҳимоя қилиш бўйича ўз фикрлари билан иштирок этиши бўйича тушунтиришлар олиб бориш.
Олий таълим, фан ва инновациялар вазирлиги хабарига кўра, 14 февраль куни ОТМ ва филиаллар раҳбарларига жўнатилган хат вазирлик томонидан мунтазам равишда ўтказилувчи онлайн йиғилишда билдирилган фикр ва мулоҳазалардан келиб чиқиб берилган топшириқдир. Бу ёзма топшириқлар ректорлар билан муҳокама қилиниб, аввалдан келишиб чиқарилган ва улар ОТМлар ички тартиб-қоидаларига алоқадор.
“ОТМ тартиб-қоидаларига амал қилмайдиган ёки бузган талабалар рўйхатини тузишдан мақсад талабаларнинг маънавий-моддий муаммоларини бартараф этиш, иқтидорини рўёбга чиқаришга кўмаклашиш, талабаларнинг вақти ва имкониятларини билим олишга йўналтириш, талабалар ва мураббийлар орасида дўстлик муҳитини яратишдир”, — дея изоҳ берган вазирлик берилган топшириқлардан бирига.
Қайд этилишича, хатда иқтидорли талабаларнинг рўйхатини шакллантириб, вазирлик ва ОТМнинг раҳбарияти ҳамда профессор-ўқитувчиларига бириктириш топшириғи ҳам берилган. Иқтидорли талабалар сони ОТМ ички тартиб-қоидаларини тушуниб етмаган талабалардан кўпроқни ташкил этади ва иқтидорли ёшларнинг муаммоларини ўрганиш ҳам алоҳида ёндашувни талаб этади. Мақсад — иқтидорли талабаларнинг муаммоларини эшитиш, уларнинг ғоя ва таклифларига мунтазам йўналиш бериб туришдир.
“Шундай қилиб, ОТМ раҳбарлари ва профессор-ўқитувчилар алоҳида эътибор талаб этиладиган талабалар билан индивидуал ишлашлари назарда тутилган. Бунда вазирлик раҳбарларининг ҳам талабалар билан мулоқотлари йўлга қўйилади”, — дейилади муносабатда.
ОТМларда электр энергия билан таъминлайдиган қуёш панелларини ўз маблағлари ҳисобидан ўрнатиш ишлари юзасидан топшириқ бўйича қуйидагича изоҳ берилган:
“Бу топшириқ ҳозирги кундаги глобал муаммо — энергия тақчиллиги масаласи ижобий ҳал этилиб, талабаларнинг қулай ўқиб, дам олишлари учун шароит яратишга қаратилган. Топшириқ ҳозирда ОТМлар томонидан бажарилмоқда ва бу бўйича вазирликнинг дайжести эълон қилиб борилмоқда”.
“Яна бир топшириқда тизим тўғрисида берилаётган фикрлар, соҳадаги ютуқ ва камчиликлар ҳақида холис фикр билдириш мақсадида талабаларни ОАВда янада фаолроқ бўлишга чақириш, ҳодиса ва воқеликка бир томонлама қарашнинг олдини олиш юзасидан тушунтиришлар олиб бориш мақсад қилинган. Бунда тизим шаънини ҳимоя қилиш деганда, албатта, фақат ижобий эмас, балки холис, асосланган танқидий фикрни илгари суриш ҳам тушунилади”, — дея изоҳ берган вазирлик.
Қайд этилишича, ёшлар ўртасида пайдо бўлаётган ёмон иллатлардан огоҳ қилиш мақсадида таъсирчан қисқа ҳикоялар нашр қилиш назарда тутилсин” деган топшириқ ҳам контекстдан узиб олинган. Олий таълим, фан ва инновациялар вазирлиги томонидан ҳозирда шундай ҳикоялар тўплами нашр этишга тайёрланди ва улар ОТМларнинг ижтимоий тармоқлардаги саҳифалари ва каналларида эълон қилиниши назарда тутилган.
“Шараф кодексига келадиган бўлсак, бунда ҳар бир ОТМ талабалари ва ўқитувчиларини бирлаштирувчи рамзларни, қадриятларни ишлаб чиқиш, илмий тадқиқотларга ундовчи йўналишларни белгилаш бўйича таклифлар тайёрлаш назарда тутилган. Ушбу кодекс талабалар, педагоглар, профессорлар ва битирувчиларни ўз олий таълим муассасаларидан ғурурланишларига, маслакдош бўлишларига хизмат қилади”, — дея тушунтириш берган олий таълим, фан ва инновациялар вазирлиги.
Изоҳ (0)