Turkiyaning TRT Haber telekanali YouTube’dagi kanalida ketma-ket dahshatli zilzilalardan jabr ko‘rgan Hatay viloyatining avval va hozir qanday ko‘rinishini ko‘rsatdi.
Hatay — Turkiyaning janubi-sharqida, Suriya bilan chegarada joylashgan viloyat. U Turkiyaning 6—7-fevral kunlari sodir bo‘lgan yirik zilzilalardan eng ko‘p zarar ko‘rgan o‘nta viloyatidan biridir. TRT Haber e’lon qilgan videoda zilzila viloyat qiyofasini qanday o‘zgartirganini ko‘rish mumkin.
Viloyatda vaqti-vaqti bilan yer silkinishlari davom etmoqda. So‘nggi rasmiy ma’lumotlarga ko‘ra, Turkiyada zilzila qurbonlari soni 41 mingdan oshdi. Mamlakatda yuz bergan zilzila oqibatida 105 mingdan ortiq bino vayron bo‘lgan. Tabiiy ofatlar oqibatlarini bartaraf etish boshqarmasi 6-fevraldagi halokatli zilzilalardan so‘ng olimlar 6 mingdan ortiq yer silkinishini hisoblaganini ma’lum qildi. Bitta aftershok 6,6 magnitudali, 40 tasi 5 dan 6 ballgacha, yana 436 tasi esa 4-5 magnitudaga yetgan.
“6-fevraldan keyingi yer silkinishlari soni 6 040 dan oshdi, taqqoslash uchun, oddiy vaqtlarda bu Turkiyada to‘rt oy ichida qayd etilgan zilzilalar soniga tengdir”, — deyiladi xabarda.
Izoh (0)