“Vagner”dan o‘rnak olib: Ramzan Qodirov ham xususiy harbiy kompaniya tashkil etmoqchi

Checheniston rahbari Ramzan Qodirov davlat xizmatidagi faoliyatini yakunlagach, xususiy harbiy kompaniya yaratmoqchiligini aytdi. Siyosatchi o‘zining Telegram kanalida bu haqda ma’lumot berdi.

Qodirovning so‘zlariga ko‘ra, “Vagner” harbiy jihatdan o‘zining samaradorligini isbotladi. Checheniston rahbari bunday “professional tuzilmalar” zarur deb hisoblaydi.

“Ishonch bilan aytishimiz mumkinki, ‘Vagner’ o‘zining harbiy nuqtayi nazardan samaradorligini isbotladi va ularga zaruriyat yuqoriligini bildirdi. Shubhasiz, bunday professional tuzilmalar kerak va zarurdir. Shu bois davlat xizmatidagi ishimni tugatgach, qadrli birodarimiz Yevgeniy Prigojin bilan raqobatlashib, xususiy harbiy kompaniya tashkil etishni jiddiy rejalashtirganman. O‘ylaymanki, hammasi amalga oshadi”, — deydi Qodirov.

U “Vagner” xususiy harbiy kompaniyasi “maxsus harbiy operatsiya” zonasida “ajoyib natijalarga” erisha olganini aytdi.

“‘Vagner’ning hujum brigadalari har doim ishning o‘ta og‘ir qismini o‘z zimmasiga olish va qiyinchiliklarga qaramay, ‘Vagner’ har qanday vaziyatda o‘z maqsadiga erishadi”, — deb yozadi Checheniston rahbari.