“Вагнер”дан ўрнак олиб: Рамзан Қодиров ҳам хусусий ҳарбий кoмпания ташкил этмоқчи

Чеченистон раҳбари Рамзан Қодиров давлат хизматидаги фаолиятини якунлагач, хусусий ҳарбий компания яратмоқчилигини айтди. Сиёсатчи ўзининг Telegram каналида бу ҳақда маълумот берди.

Қодировнинг сўзларига кўра, “Вагнер” ҳарбий жиҳатдан ўзининг самарадорлигини исботлади. Чеченистон раҳбари бундай “профессионал тузилмалар” зарур деб ҳисоблайди.

“Ишонч билан айтишимиз мумкинки, ‘Вагнер’ ўзининг ҳарбий нуқтаи назардан самарадорлигини исботлади ва уларга зарурият юқорилигини билдирди. Шубҳасиз, бундай профессионал тузилмалар керак ва зарурдир. Шу боис давлат хизматидаги ишимни тугатгач, қадрли биродаримиз Евгений Пригожин билан рақобатлашиб, хусусий ҳарбий компания ташкил этишни жиддий режалаштирганман. Ўйлайманки, ҳаммаси амалга ошади”, — дейди Қодиров.

У “Вагнер” хусусий ҳарбий компанияси “махсус ҳарбий операция” зонасида “ажойиб натижаларга” эриша олганини айтди.

“Вагнер”нинг ҳужум бригадалари ҳар доим ишнинг ўта оғир қисмини ўз зиммасига олиш ва қийинчиликларга қарамай, ‘Вагнер’ ҳар қандай вазиятда ўз мақсадига эришади”, — деб ёзади Чеченистон раҳбари.