Rossiyaning Ukrainadagi bosqini boshlanganidan buyon “Vagner” xususiy harbiy kompaniyasining 30 mingdan ortiq yollanma askari halok bo‘ldi yoki yaralandi, dedi AQSH Milliy xavfsizlik kengashi vakili Jon Kirbi. Uning so‘zlaridan CNN iqtibos keltirmoqda.
Oq uy maʼlumotlariga ko‘ra, to‘qqiz mingga yaqin rossiyalik halok bo‘lgan, ularning yarmi 2022-yil dekabr oyi o‘rtalaridan beri o‘ldirilgan. Kirbining ta’kidlashicha, dekabr oyida o‘ldirilganlarning qariyb 90 foizi Rossiya qamoqxonalaridan yollangan askarlar edi.
“Ular o‘z askarlariga, asosan, mahkumlarga g‘ayriinsoniy munosabatda bo‘lib, ularni to‘g‘ridan to‘g‘ri go‘sht maydalagichga otgandek uloqtirmoqda. U (“Vagner” asoschisi Yevgeniy Prigojin) qamoqdan odamlarni shunchaki olib, tayyorgarliksiz, zarur qurollarsiz, tashkiliy qo‘mondonsiz jang maydoniga tashlamoqda”, — dedi Kirbi. Uning so‘zlariga ko‘ra, “Vagner”da mahbuslarni yollash kamaymagan.
AQSH Davlat departamenti kotibi o‘rinbosari Viktoriya Nuland fevral oyi boshida Rossiya yil davomida 200 mingdan ortiq odamidan ayrilgani haqida aytgandi. Britaniya ma’lumotlariga ko‘ra, “Vagner” yollanma jangchilari orasida yo‘qotishlarning umumiy soni, taxminan, 50 foizga yetadi.
AQSH va Buyuk Britaniya “vagnerchi”lar sonini 40—50 ming kishiga baholagan. Yanvar oyida “Rus sidyashaya” fondi rahbari Olga Romanova “Vagner” guruhi 50 ming mahbusni jalb qilgan bo‘lishi mumkinligini aytdi. Romanovaning ta’kidlashicha, frontda 10 mingga yaqin odam qolgan, boshqalari esa o‘lgan, yaralangan, bedarak yo‘qolgan, tashlab ketilgan yoki asirga olingan.
Izoh (0)