Toshkent xalqaro aeroportini shahardan tashqariga ko‘chirish loyihasi hukumat tomonidan vaqtincha to‘xtatib qo‘yilgan. Bu haqda 17-fevral kuni bo‘lib o‘tgan matbuot anjumanida Uzbekistan Airports boshqaruvi raisi Raʼno Jo‘rayeva aytib o‘tdi, deb xabar bermoqda “Daryo” muxbiri.
Gap nimada?
Uzbekistan Airports boshqaruvi raisi Raʼno Jo‘rayeva 2022-yil iyun oyida prezident va hukumat Toshkent aeroportini shahar tashqarisiga ko‘chirishning maqsadga muvofiqligini muhokama qilayotganini aytib o‘tgan edi.
Raʼno Jo‘rayevaning aytishicha, yangi uchish-qo‘nish yo‘laklarini qurishning imkoni yo‘qligi sababli havo bandargohining hozirgi quvvatlari uzog‘i bilan 2027-yilgacha yetadi.
“Hozirda Toshkentga yo‘lovchilar oqimi o‘sishi surʼatlarini qo‘llab-quvvatlash uchun barcha ishni qilyapmiz. Shu bois joriy yil oxirigacha soatiga 2400 yo‘lovchiga mo‘ljallangan terminalni tezda qurishga majburmiz. Yagona fasadli, kelish va ketishlar bir joyda bo‘lgan, shuning uchun biz keyteringni boshqa joyga o‘tkazamiz. Albatta, bularning barchasi bizga uzog‘i bilan 2027-yilgacha yetarli bo‘ladi”, — dedi u.
Raʼno Jo‘rayeva 2035-yilgacha mamlakat aeroportlarini rivojlantirish strategiyasida shahardan 30 km uzoqlikda yangi Toshkent aeroportini qurish va uni xalqaro xab sifatida rivojlantirishni taklif qilgan edi.
Loyiha vaqtincha to‘xtatilgan
Uzbekistan Airports boshqaruvi raisining maʼlum qilishicha, aeroportni ko‘chirish bo‘yicha ayni vaqtda hech qanday harakat yo‘q.
“Hozircha loyiha hukumat tomonidan vaqtincha to‘xtatib turilibdi. Ushbu masalada aniq to‘xtamga kelinganicha yo‘q”, — dedi Raʼno Jo‘rayeva.
Anjumanda taʼkidlanishicha, hozirgi Toshkent xalqaro aeroportini 2021 va 2022-yillarda modernizatsiya qilish, axborot texnologiyalarini rivojlantirish va loukoster modeli asosida hududiy aviatashuvchini tashkil etish maqsadida 2115,1 milliard so‘m sarmoya kiritilgan. 2023-yilda 2394,8 mlrd so‘m sarmoya kiritish rejalashtirilgan.
Shuningdek, Uzbekistan Airports aeroportlarda eskirgan maxsus texnikalar parkini bosqichma-bosqich yangilamoqda. 2021-yilda 5,2 million dollarga 48 dona, 2022-yilda 14,5 million dollarga 112 dona maxsus texnika xarid qilingan. 2023-yilda aeroportlarda 42,7 million dollar evaziga 199 dona maxsus texnikani yangilash zarurati mavjud.
Izoh (0)