Shavkat Mirziyoyev 17-fevral kuni mahallalar hayoti va sanoat korxonalari faoliyati bilan tanishish uchun Buxoro viloyatiga borgandi. Davlat rahbari “Rabotiqalmoq” mahallasida bo‘lib, aholi hayoti bilan tanishdi, deb xabar bermoqda Prezident matbuot xizmati.
Qayd etilishicha, bu yerda 9 mingdan ziyod aholi yashaydi. Ilgari foydalanilmay yotgan maydonda tikuvchilik korxonasi qurilishi natijasida 30 dan ortiq xotin-qiz o‘z mahallasida ishli bo‘lgan. Korxona 100 mingta trikotaj mahsulotlari uchun buyurtma olgan.
Davlat rahbari mazkur korxona faoliyati bilan tanishib, ishchilar bilan suhbatlashgan.
“Mahalladagi o‘zgarishlarni, sizning ishli bo‘lganingizni ko‘rib, xursand bo‘ldim. Bular — xalq ichiga kirib, xalq bilan birga qilayotgan sa’y-harakatlarimizning kichik bir natijasi. Agar hokimlik va tashkilotlar sharoit yaratib berolsa, har bir oila o‘zini eplab ketolsa, maqsadimga erishgan bo‘laman. Shunda katta oilamiz — davlatimiz ham mustahkam bo‘ladi”, — degan prezident.
Ta’kidlanishicha, shu yerda viloyatdagi tadbirkor ayollarning hanarmandchilik mahsulotlaridan namunalar namoyish etilgan. Ular ishlab chiqarishda va kasanachilik asosida xotin-qizlar bandligini ta’minlayotganini so‘zlab bergan. Davlat rahbari ularning bu boradagi harakatlarini qo‘llab-quvvatlash bo‘yicha mutasaddilarga ko‘rsatmalar bergan.
“Rabotiqalmoq” mahallasida yana 10 dan ortiq savdo va servis shoxobchalari, Tadbirkorlarga xizmat ko‘rsatish markazi ham bor. Mahalla fuqarolar yig‘ini binosi ta’mirlangan. Aholining bo‘sh vaqti mazmunli o‘tishi uchun “Otaxonlar choyxonasi”, kutubxona, sport maydonchasi, hammom va xiyobonlar tashkil etilgan.
Davlat rahbari bu sharoitlarni ko‘zdan kechirgan, shu yerlik Baxtiyor Po‘latov xonadonida mehmon bo‘lgan.
Izoh (0)