Тошкент халқаро аэропортини шаҳардан ташқарига кўчириш лойиҳаси ҳукумат томонидан вақтинча тўхтатиб қўйилган. Бу ҳақда 17 февраль куни бўлиб ўтган матбуот анжуманида Uzbekistan Airports бошқаруви раиси Раъно Жўраева айтиб ўтди, деб хабар бермоқда “Дарё” мухбири.
Гап нимада?
Uzbekistan Airports бошқаруви раиси Раъно Жўраева 2022 йил июнь ойида президент ва ҳукумат Тошкент аэропортини шаҳар ташқарисига кўчиришнинг мақсадга мувофиқлигини муҳокама қилаётганини айтиб ўтган эди.
Раъно Жўраеванинг айтишича, янги учиш-қўниш йўлакларини қуришнинг имкони йўқлиги сабабли ҳаво бандаргоҳининг ҳозирги қувватлари узоғи билан 2027 йилгача етади.
“Ҳозирда Тошкентга йўловчилар оқими ўсиши суръатларини қўллаб-қувватлаш учун барча ишни қиляпмиз. Шу боис жорий йил охиригача соатига 2400 йўловчига мўлжалланган терминални тезда қуришга мажбурмиз. Ягона фасадли, келиш ва кетишлар бир жойда бўлган, шунинг учун биз кейтерингни бошқа жойга ўтказамиз. Албатта, буларнинг барчаси бизга узоғи билан 2027 йилгача етарли бўлади”, — деди у.
Раъно Жўраева 2035 йилгача мамлакат аэропортларини ривожлантириш стратегиясида шаҳардан 30 км узоқликда янги Тошкент аэропортини қуриш ва уни халқаро хаб сифатида ривожлантиришни таклиф қилган эди.
Лойиҳа вақтинча тўхтатилган
Uzbekistan Airports бошқаруви раисининг маълум қилишича, аэропортни кўчириш бўйича айни вақтда ҳеч қандай ҳаракат йўқ.
“Ҳозирча лойиҳа ҳукумат томонидан вақтинча тўхтатиб турилибди. Ушбу масалада аниқ тўхтамга келинганича йўқ”, — деди Раъно Жўраева.
Анжуманда таъкидланишича, ҳозирги Тошкент халқаро аэропортини 2021 ва 2022 йилларда модернизация қилиш, ахборот технологияларини ривожлантириш ва лоукостер модели асосида ҳудудий авиаташувчини ташкил этиш мақсадида 2115,1 миллиард сўм сармоя киритилган. 2023 йилда 2394,8 млрд сўм сармоя киритиш режалаштирилган.
Шунингдек, Uzbekistan Airports аэропортларда эскирган махсус техникалар паркини босқичма-босқич янгиламоқда. 2021 йилда 5,2 миллион долларга 48 дона, 2022 йилда 14,5 миллион долларга 112 дона махсус техника харид қилинган. 2023 йилда аэропортларда 42,7 миллион доллар эвазига 199 дона махсус техникани янгилаш зарурати мавжуд.
Изоҳ (0)