Shavkat Mirziyoyev mahallalar hayoti va sanoat korxonalari faoliyati bilan tanishish uchun 17-fevral kuni Buxoro viloyatiga bordi.
Prezident matbuot xizmatining ma’lum qilishicha, davlat rahbari viloyatga tashrifini Bahouddin Naqshband maqbarasini ziyorat qilishdan boshladi. Qurʼon tilovat qilindi. O‘tganlarga rahmat, O‘zbekistonga tinchlik-farovonlik tilab duo o‘qildi.
Hamma joylarga borib, sohalarga turtki berib, muammolarni hal etib, xalqni rozi qilishga harakat qilyapmiz. Bugun Buxoroga ham yangi marralarni belgilash, odamlarning birini ikki qilish uchun keldik. Hamma xayrli ishlarimizda Allohning o‘zi madadkor bo‘lsin, — dedi Shavkat Mirziyoyev.
Olimlar bilan suhbatda diniy taʼlimni rivojlantirish, jaholatga qarshi maʼrifat bilan kurashish zarurligi taʼkidlandi.
Oxirgi yillarda hamma sohalar qatori din bo‘yicha ham ochiqlik, erkinlik berildi, bir nechta ilmiy markazlar tashkil etdik. Lekin bulardan xalqimizga nima manfaat bo‘lyapti? Manfaat shunday bo‘lishi kerakki, bu salohiyatni jamiyatga yetkazish kerak. Buxoriy, Moturidiy, Marg‘inoniy kabi buyuk bobolarimiz merosiga tayangan holda jaholatga qarshi maʼrifat bilan kurashish zarur. Buning uchun diniy taʼlimni amaliyot bilan bog‘lash, ilmiy markazlarimizni dunyoda yetakchilarga aylantirish kerak, — deb ta'kidladi davlat rahbari.
Prezident matbuot kotibining ma’lum qilishicha, tashrif davomida yangi loyihalarni ishga tushirish hamda viloyatni rivojlantirishning muhim masalalarini muhokama qilish rejalashtirilgan.
Izoh (0)