“O‘zgidromet” dam olish kunlari qanday ob-havo bo‘lishini ma’lum qildi

“O‘zgidromet” 18—19-fevral kunlari uchun ob-havo prognozini e’lon qildi.

Unga ko‘ra, shanba kuni respublika hududining katta qismida yog‘ingarchilik to‘xtaydi, faqat respublika janubi-sharqiy hududlarining ba’zi joylarida biroz yomg‘ir yog‘adi. Yakshanba kuni O‘zbekistonning barcha hududlarida yog‘ingarchiliksiz ob-havo bo‘lishi kutilmoqda. Respublika bo‘yicha ba’zi joylarga tuman tushishi kuzatiladi.

Havo harorati kechasi 0-5 daraja iliq atrofida, ba’zi joylarda 2 darajagacha sovuq bo‘ladi, kunduz kuni esa 7-12 darajaga ko‘tariladi.

Toshkentda dam olish kuni yog‘ingarchilik kutilmaydi. Kechasi va ertalab tuman tushishi mumkin. Harorat kechasi 0-3 daraja iliq, kunduzi shanba kuni 8-10 daraja iliq, yakshanba kuni 10-12 daraja iliq bo‘ladi.

Respublikaning tog‘oldi va tog‘li hududlarida 17—18-fevral kunlari sel-suv toshqin hodisalari yuzaga kelishi mumkin. Qor ko‘chishi xavfi saqlanib turadi.