Ayollar har bir ishda mukammallikni xohlaydi. Chiroyli soch turmaklar uchun tabiiy qalin sochlar kerak. Ammo oramizda siyrak sochli xonimlar yo‘q emas. Hafsala bilan qilingan soch turmagi endi 5 daqiqada tushib ketmasligining turli yo‘llari bor. Quyida uy sharoitida ko‘p pul sarflamasdan sochlarga hajm berish va to‘g‘ri parvarish qilishni o‘rgatamiz, deb yozmoqda “Noviy ochag” nashri.
Soch uzunligidan tez-tez kesib turing
Soch qanchalik uzun bo‘lsa, uning og‘irligidan soch turmagi pastga tushib ketadi. Tabiiy hajmdor ko‘rinishi uchun qisqaroq sochlarni sinab ko‘ring.
Ko‘p qavatli soch uslubi
Yaʼni uchlari bir necha qavat zinama-zina qilib kesilgan soch uchlari bir xil uzunlikda bo‘lgan sochlardan ko‘ra hajman ko‘proq ko‘rinadi. Yaxshi tomoni, bu uslub barcha yuz shakllari uchun yarashadi.
Yorqinlik qo‘shing
Sifatli qilingan “melirovaniye” yoki ranglarning bir-biriga uyg‘unligi sochlarni vizual ravishda hajmdorligini oshiradi.
Sochlarni to‘g‘ri yuving
- Boshni yuvayotganda shampunni soch ildizidan butun uzunlik bo‘ylab uchigacha surib, yaxshilab yuvish kerak. Soch uchlari mo‘rt bo‘lgani uchun qattiq ishqalab yuvish yaramaydi.
- Balzamlarni doim sochning uchlariga qo‘llash kerak. Ildiziga ishlov berilsa, soch turmaklari tushib ketishiga sabab bo‘ladi, chunki balzam sochni yumshatish xususiyatiga ega.
- Sochlarni har kuni yuvmang. Kundalik soch parvarishi uchun quruq shampundan foydalanishingiz mumkin.
Soch ildizlariga ozgina ishlov berish
Agar uyda soch uchun hajm beruvchi sprey va loklar tugagan bo‘lsa, jingalak qilish uchun dazmol yoki boshqa vositalar bo‘lmasa, sochlarni namlab, uning ildiziga zakolka qistirib qo‘ying. Qurigach olib tashlansa, sochning yuqori qismi hajmdor va qalin bo‘lib qoladi.
Soch uchun mo‘ljallangan musslardan ko‘p foydalanmang
Meʼyordan ko‘p muss ishlatish sochni og‘irlashtiradi. Qisqa sochlar uchun hajmi yong‘oqdek ko‘pik, o‘rtacha uzunlikdagi sochga tuxumdek hamda uzun nozik sochlar uchun esa tennis koptokchasidek hajmdagi muss yetarli bo‘ladi.
“Tabiiy betartib” soch turmaklardan foydalaning
Sochni biroz jingalak qiling. Haddan tashqari silliq dazmollangan sochlar nihoyatda tekis ko‘rinadi.
Quruq shampundan foydalaning
Shampun tugab qolgan bo‘lsa, chaqaloqlar upasi (talk)dan foydalaning. Upani soch ildizlariga seping. Yog‘ va kirlardan holi bo‘lgan soch hajmini saqlab qoladi va ular endi bir-biriga yopishib qolmaydi.
Boshni pastga egib turgan holda soch quriting
Ayollar hamisha yo‘l qo‘yadigan xatolaridan bittasi boshni yuqoridan quritadi. Agar boshni pastga egib soch quritganda bosh aylansa, boshni ko‘tarib taroq yordamida ularni yuqoriga tarab quriting.
Farq ochishni o‘zgartiring
Sochning odatiy farqni boshqacharoq, masalan, markazdan qiyalatib yoki yonboshdan zigzagsimon qilib farq oching. Xohishga qarab, farq ochmasangiz ham bo‘ladi.
Mavzuga doir:
Izoh (0)