O‘zbekistonning yana ikki hududi: Qarshi va Toshkent shahrida BAA investorlari tomonidan ayollar va bolalar klinikalari quriladi. Bu haqda Investitsiyalar, sanoat va savdo vazirligi axborot xizmati xabar berdi.
Xabarga ko‘ra, 15-fevral kuni O‘zbekiston ishchi guruhi Birlashgan Arab Amirliklarida tashrifining ikkinchi kuni investitsiyalar, sanoat va savdo vaziri Laziz Kudratov BAA sanoat va ilg‘or texnologiyalar vaziri – Masdar kompaniyasi boshqaruvi raisi Sulton Ahmad al-Jobir va ushbu mamlakatning bir qator yetakchi kompaniyalari rahbarlari bilan uchrashuvlar o‘tkazdi. Kun tartibidan investitsiyaviy hamkorlik yo‘nalishlarini kengaytirish va iqtisodiyotning ustuvor tarmoqlarida yangi yirik loyihalarni birgalikda amalga oshirish masalalari o‘rin oldi. Sulton Ahmad al-Jobir bilan kimyo sanoati, metallurgiya va geologiya-qidiruv sohalarida joriy loyihalarni amalga oshirishning borishi va yangi sarmoyaviy tashabbuslarni amalga oshirish rejalari muhokama qilindi.
“Xalifa bin Zoid al-Nahayan” jamg‘armasi bosh direktori Muhammad Hoji al-Xuriy bilan uchrashuvda Nukus shahrida ayollar va bolalar klinikasini qurish loyihasi amalga oshirilayotgani taʼkidlandi. Qarshi va Toshkent shaharlarida ham shunday shifoxonalar qurish istiqbollari, shuningdek, O‘zbekistonda yangi tug‘ilgan chaqaloqlarni eshitish qobiliyatini tekshirishning universal tizimini joriy etish masalalari ko‘rib chiqildi.
Shuningdek, International Holding Company bosh ijrochi direktori Sayed Basar Shueb bilan O‘zbekistonning sog‘liqni saqlash, energetika va boshqa tarmoqlarida qo‘shma loyihalarni amalga oshirish masalalari muhokama qilindi. Tomonlar mamlakat investitsiyaviy salohiyati bilan yaqindan tanishish, qo‘shma tashabbuslarni amalga oshirish bo‘yicha aniq shartnomalar tuzish maqsadida kompaniya rahbariyati va ekspertlarining O‘zbekistonga tashrifini tashkil etishga kelishib oldi.
ADSSC bosh direktori A.Shamsi bilan uchrashuvda asosiy eʼtibor Toshkent shahridagi oqava suv tizimini DXSH tamoyillari asosida takomillashtirish loyihasini amalga oshirishga qaratildi. Loyiha doirasida zamonaviy muhandislik inshootlarini qurish nazarda tutilgan. Tegishli investitsiya taklifi loyihasi 2023-yilning bahorida imzolanishi rejalashtirilgan.
RAK Ceramics kompaniyasi ijrochi direktori A.Massad bilan uchrashuvda O‘zbekistonning qurilish materiallari ishlab chiqarish yo‘nalishidagi sanoat salohiyati atroflicha ko‘rib chiqildi. Eksportga mo‘ljallangan mahsulotlar, xususan, kafel va kulolchilik mahsulotlari ishlab chiqarish loyihasi ustida ish boshlash bo‘yicha kelishuvga erishildi.
Uchrashuvlar ishtirokchilarga manfaatlar kesishuvi nuqtalarini aniqlash hamda istiqbolli investitsiya loyihalarini amalga oshirish, ijtimoiy infratuzilmani yaxshilash va yangi ish o‘rinlari yaratish kabi amaliy natijalarga eʼtibor qaratgan holda hamkorlikni rivojlantirish rejalarini belgilash imkonini berdi.
Izoh (0)