Futbol bo‘yicha Yevropa Ligasining 1/8 finaliga o‘tish o‘yinida “Barselona” va “Manchester Yunayted” jamoalari 16-fevral, payshanba kuni “Kamp Nou”da o‘zaro to‘qnash keladi.
Kataloniyaliklar Chempionlar Ligasining C guruhida 3-o‘rinni egallab, Yevropa Ligasiga tushib ketgan edi. “Qizil iblislar” esa ushbu musobaqaning E guruhida 2-o‘rinni band etgandi. Qur’aga ko‘ra jamoalar bir-biriga qarshi bahs olib boradigan bo‘ldi.
Ular Yevropa Ligasida ilk bor to‘qnash kelmoqda
Yevropa Ligasining pley-off bosqichi qur’asi juda katta qiziqishlarga sabab bo‘ldi. “Manchester Yunayted”, “Barselona”, “Yuventus” va “Ayaks” kabi katta jamoalar ham ushbu musobaqada ishtirok etmoqda. “Manchester Yunayted” va “Barselona” juftligi esa sifatli Yevrokuboklar haftaligini yana bir kunga uzaytirdi.
Menimcha, “Barselona” ham biz kabi bu o‘yinni finalda bo‘lishini afzal ko‘rgan bo‘lardi, — deydi mankunianlar bosh murabbiyi Erik ten Hag.
“Manchester Yunayted” niderlandiyalik mutaxassis qo‘l ostida Aleks Fergyuson davridan buyon bo‘lmagan barqaror ochko jamg‘arishni o‘rgandi. APL jadvalida “qizil iblislar” 3-o‘ringa mustahkam joylashgan, mavsum avvalidagi ikkita mag‘lubiyatdan va ishonchsiz o‘yindan so‘ng bunga ishonish qiyin edi. “Manchester Yunayted” — joriy mavsum 4 ta musobaqada ham ishtirokini davom ettirayotgan yagona klub. Ten Hag shubhasiz to‘g‘ri yo‘lda.
Ularga qarshi o‘yin qiyin kechadi, — dedi “Barselona” bosh murabbiyi Xavi raqib haqida.
O‘z navbatida “Barselona” Ispaniya chempionatida yetakchilik qilmoqda. “Real” bilan oradagi farq 8 ochko. Kataloniyaliklar barcha musobaqalarda ketma-ket 11 ta g‘alabani qo‘lga kiritdi. “Ko‘k-anorranglilar” so‘nggi bor 2022-yil oktabr oyida YCHL doirasida “Bavariya”ga mag‘lub bo‘lgandi. Xavi “Barselona”da sifatli ishni amalga oshirmoqda.
“Barselona” va “Manchester Yunayted”ning yo‘llari Chempionlar Ligasida tez-tez kesishib turadi. Ikki marta guruh bosqichida (1994/95, 1998/99-yilgi mavsumlar) o‘zaro to‘qnash kelgan. Pley-off bosqichi esa (2007/08 va 2018/19-yilgi mavsumlar) hali xotiralardan o‘chmadi. Pep Gvardiola Aleks Fergyusondan bir bosh ustunligini isbotlagan finallar esa (2008/09 va 2010/11) tarixga muhrlangan.
“Manchester Yunayted” Kataloniya poytaxtiga mehmon bo‘lgan o‘yinlarni yodga olamiz.
YCHL 1994/95-yilgi mavsum. Guruh bosqichi. 4-tur. “Barselona” 4:0 “Manchester Yunayted”
O‘sha vaqtlarda Chempionlar Ligasining guruh bosqichida 16 ta jamoa ishtirok etgan. Barcha ishtirokchilar — o‘z mamlakatlarining chempionlari. “Yunayted” “Barselona”, “Gyoteborg” va “Galatasaroy” bilan bir guruhga tushdi.
Ser Aleks shogirdlari guruh bosqichini “Gyoteborg” ustidan 4:2 hisobidagi g‘alaba bilan boshladi. Istambuldagi 0:0 hisobida durangdan so‘ng 3-turda “Barselona”ni qabul qilishi kerak edi. “Old Trafford”da o‘tgan o‘yin durang (2:2) bilan yakunlangan.
Oradan 2 hafta o‘tib, mankunianliklar “Kamp Nou”da mehmon bo‘lgan. “Barselona”ni faqatgina g‘alaba qoniqtirar edi. Boshqa har qanday natija Yohan Kroyff jamoasining pley-offga chiqish vazifasini murakkablashtirardi.
Mehmonlar safida hamon Erik Kantona yo‘q edi. Fransuz bir yil avval Chempionlar Ligasining “Galatasaroy”ga qarshi javob o‘yinida politsiya bilan sodir bo‘lgan to‘qnashuv uchun diskvalifikatsiya qilingan edi.
Mezbonlarda esa ilk daqiqalardanoq bosh murabbiyning o‘g‘li Yordi Kroyff maydonda ko‘rinish berdi. 20 yoshli futbolchi 60 daqiqa harakat qildi. Uning faol harakatlari evaziga “Barselona” raqib darvozasiga javobsiz 4 ta gol urgan.
Ispaniyadagi yirik mag‘lubiyatdan so‘ng “Manchester Yunayted”ning Shvetsiyaga safari ham omadsiz kechdi. Jamoa “Gyoteborg”ga 1:3 hisobida imkoniyatni boy berdi. Natijada mankunianliklar guruhda 3-o‘rinni egalladi. Ketma-ket ikkinchi yil “Manchester Yunayted”ning Yevrokuboklardagi yurishi ko‘ngildagidek o‘tmadi.
YCHL 1998/99-yilgi mavsum. Guruh bosqichi. 5-tur. “Barselona” 3:3 “Manchester Yunayted”
O‘sha mavsumda guruh bosqichida 24 ta jamoa ishtirok etgan. G‘oliblar to‘g‘ridan to‘g‘ri pley-offga yo‘l olardi. Ikkinchi o‘rinni egallagan eng yaxshi ikki jamoa esa keyingi bosqich yo‘llanmasi uchun kurash olib borgan. “Manchester Yunayted”, “Bavariya”, “Barselona” va “Brondbyu” — norasmiy ravishda nomlangan “o‘lim guruhi”.
“Old Trafford”da o‘tgan dastlabki turdayoq jamoalar 3:3 hisobini qayd etdi. “Manchester Yunayted” guruh bosqichida juda ko‘p gol urardi, shu bilan birga o‘z darvozasidan juda ko‘p to‘p olib chiqardi. Lui van Gal qo‘l ostidagi “Barselona” esa barqaror o‘yin namoyish etmasdi. Ispaniyaliklar ikkita o‘yindayam “Bavariya”ga mag‘lub bo‘lib, o‘z vazifasini qiyinlashtirgan. “Kamp Nou”da esa ularga faqatgina g‘alaba kerak edi.
Natija: birinchi turdagi hisob yana bir bor qayd etilib, katalonlar musobaqadan chiqib ketgan. Tarkibida 2 nafar “Oltin to‘p” sohibi bo‘lgan klubga 100 yoshini o‘z maydonida g‘alaba bilan nishonlash nasib etmagan.
“Manchester Yunayted” o‘sha mavsumda yana bir bor Barselonaga tashrif buyurgan va finalda “Bavariya” ustidan tarixiy g‘alabani qo‘lga kiritgan.
Bu eng katta muvaffaqiyat deb o‘ylayman. Guruh bosqichida “Bavariya” va “Barselona” kabi jamoalar bilan to‘qnashdik, yo‘limizda davom eta oldik. Qo‘l ostimda “Manchester Yunayted” ilk bor Chempionlar Ligasini sohibiga aylandi va bu hayotimizdagi eng muhim o‘yin edi, — degan edi 1999-yilgi finaldan keyin Aleks Fergyuson.
YCHL 2007/08-yilgi mavsum. Pley-off. Yarim final. “Barselona” 0:0 “Manchester Yunayted”
15 yil oldin Krishtianu Ronaldu va Lionel Messi ilk bor maydonda to‘qnash kelgan. Portugaliyalik “Manchester Yunayted” safida aqlbovar qilmas mavsumini o‘tkazgan, barcha musobaqalarda 40 dan ortiq gol urgandi. Argentinalik esa endigina o‘z yo‘lini boshlayotgan edi. 20 yoshli vunderkindning “gol+pas” tizimida 30 ochko jamg‘arishi g‘ayrioddiy futbolchi o‘sib kelayotganining isboti edi.
Mankunianlar Premyer Ligada ketma-ket ikkinchi g‘alabasini nishonlashga tayyorgarlik ko‘rayotgandi. Frank Raykard boshchiligidagi “Barselona” esa Ispaniya chempionatida 4 o‘yindan buyon g‘alaba nimaligini bilmayotgan edi.
O‘yinning 2-daqiqasidayoq 11 metrlik jarima zarbasi belgilandi. Biroq “Manchester Yunayted”ning 7-raqamli futbolchisi hisobni ocholmadi. Uchrashuv yakunida qayd etilgan 0:0 hisobi ikkala jamoa uchun ham yaxshi imkoniyatni qoldirdi.
“Old Trafford”da o‘tgan javob o‘yinida Pol Skoulz tomonidan urilgan ajoyib gol qarama-qarshilik taqdirini hal qildi. “Manchester Yunayted” finalga yo‘l oldi va o‘z tarixidagi uchinchi YCHL kubogiga ega chiqdi.
“Old Trafford”dagi mag‘lubiyatdan 10 kun o‘tib, Xoan Laporta keyingi mavsumdan Raykard o‘rnini Pep Gvardiola egallashini e’lon qilgandi.
YCHL 2018/19-yilgi mavsum. Pley-off. 1/4 final. “Barselona” 3:0 “Manchester Yunayted”
Ingliz klubining kataloniyaliklar poytaxtiga so‘nggi tashrifi muxlislar yodida uzoq saqlanib qolishi gumon. “Park de Prens”dagi fransuz ertagi Ispaniyada davom ettirilmadi.
Sulsher “Manchester Yunayted” bosh murabbiyligiga kelgach, ketma-ket 11 o‘yinlik mag‘lubiyatsiz seriya namoyish etib, jamoaning ruhiyatini ko‘targan edi. “PSJ” ustidan qozonilgan g‘alabadan so‘ng rahbariyat norvegiyalik mutaxassisni doimiy murabbiylikka tasdiqladi. Qizig‘i, shartnoma imzolangandan so‘ng jamoaning natijalari keskin ravishda pasayib ketdi.
“Manchester Yunayted” uy uchrashuvida mag‘lubiyatga uchradi. Javob o‘yinida esa Lionel Messi dastlabki 20 daqiqa ichida dublni rasmiylashtirdi. Ikkinchi bo‘limda Koutinyo tomonidan urilgan gol esa yakuniy hisobni o‘rnatdi.
Mankunianlar “Barselona”ni “Kamp Nou”da hech qachon mag‘lub eta olmagan. 1999-yilgi Chempionlar Ligasi finalida “Bavariya” ustidan qozonilgan g‘alaba “qizil iblislar” uchun Barselona bosh arenasidagi yagona yutuqligicha qolmoqda. Erik ten Hag tarixga kirishi uchun yana bir imkoniyat.
Izoh (0)