Janubiy Koreya Mudofaa vazirligi 2022-yilgi mudofaa bo‘yicha Oq kitobida Shimoliy Koreya rejimi va harbiy kuchlarini so‘nggi olti yil ichida birinchi marta “dushman” deb atadi. Bu haqda Yonhap agentligi masaladan xabardor odamlarga tayanib yozmoqda.
“Chunki Shimol hukmron partiya Markaziy qo‘mitasining 2022-yil dekabrida bo‘lib o‘tgan yalpi majlisida bizni ‘shubhasiz dushman’ deb belgilagan va o‘z yadroviy dasturidan voz kechmagan holda harbiy tahdid tug‘dirishda davom etmoqda, Shimoliy Koreya rejimi va harbiylari — bu tahdid ijrochilari — bizning dushmanlarimizdir”, — deya hujjatdan iqtibos keltirgan agentlik.
Oq kitobda Yaponiya 2018-yildan beri birinchi marta “yaqin qo‘shni” nomini oldi.
“Koreya Respublikasi va Yaponiya qadriyatlarni birlashtirmoqda. Yaponiya yaqin qo‘shni davlat bo‘lib, Koreya u bilan umumiy manfaatlarga xizmat qiluvchi kelajakdagi munosabatlarni o‘rnatish uchun hamkorlik qilishi kerak”, — deyiladi hujjatda.
Shimoliy Koreya armiyasi birinchi marta 1995-yilda Janubiy Koreya mudofaa siyosati hujjatida “dushman” deb belgilangandi — bunga Pxenyan hukumati vakilining Seulni “alanga dengizi”ga aylantirish bilan tahdid qilgani sabab bo‘lgan.
2004-yilgi versiyada “dushman” iborasi, murosa fonida “to‘g‘ridan to‘g‘ri harbiy tahdid” bilan almashtirildi.
Shimoliy Koreyaga nisbatan “dushman” nomi 2010-yilda Oq kitobga qaytdi va 2016-yilgacha saqlanib qoldi.
Keyinchalik 2018 va 2020-yillarda Shimol bilan yarashishga intilgan prezident Mun Chje In davrida bu nom rasmiy qaydlardan olib tashlandi.
Oq kitob Janubiy Koreya Milliy Mudofaa vazirligining rasmiy hujjatidir. U har ikki yilda bir marta nashr etiladi va mamlakatning harbiy siyosati haqidagi ma’lumotlarni o‘z ichiga oladi.
Izoh (0)