Жанубий Корея Мудофаа вазирлиги 2022 йилги мудофаа бўйича Оқ китобида Шимолий Корея режими ва ҳарбий кучларини сўнгги олти йил ичида биринчи марта “душман” деб атади. Бу ҳақда Yonhap агентлиги масаладан хабардор одамларга таяниб ёзмоқда.
“Чунки Шимол ҳукмрон партия Марказий қўмитасининг 2022 йил декабрида бўлиб ўтган ялпи мажлисида бизни ъшубҳасиз душманъ деб белгилаган ва ўз ядровий дастуридан воз кечмаган ҳолда ҳарбий таҳдид туғдиришда давом этмоқда, Шимолий Корея режими ва ҳарбийлари — бу таҳдид ижрочилари — бизнинг душманларимиздир”, — дея ҳужжатдан иқтибос келтирган агентлик.
Оқ китобда Япония 2018 йилдан бери биринчи марта “яқин қўшни” номини олди.
“Корея Республикаси ва Япония қадриятларни бирлаштирмоқда. Япония яқин қўшни давлат бўлиб, Корея у билан умумий манфаатларга хизмат қилувчи келажакдаги муносабатларни ўрнатиш учун ҳамкорлик қилиши керак”, — дейилади ҳужжатда.
Шимолий Корея армияси биринчи марта 1995 йилда Жанубий Корея мудофаа сиёсати ҳужжатида “душман” деб белгиланганди — бунга Пхенян ҳукумати вакилининг Сеулни “аланга денгизи”га айлантириш билан таҳдид қилгани сабаб бўлган.
2004 йилги версияда “душман” ибораси, муроса фонида “тўғридан тўғри ҳарбий таҳдид” билан алмаштирилди.
Шимолий Кореяга нисбатан “душман” номи 2010 йилда Оқ китобга қайтди ва 2016 йилгача сақланиб қолди.
Кейинчалик 2018 ва 2020 йилларда Шимол билан ярашишга интилган президент Мун Чжэ Ин даврида бу ном расмий қайдлардан олиб ташланди.
Оқ китоб Жанубий Корея Миллий Мудофаа вазирлигининг расмий ҳужжатидир. У ҳар икки йилда бир марта нашр этилади ва мамлакатнинг ҳарбий сиёсати ҳақидаги маълумотларни ўз ичига олади.
Изоҳ (0)