Туркия ҳукумати зилзила пайтида бинолар қулагани сабабини маълум қилди. Aфтершок лар ҳали ҳам давом этмоқда

Туркиядаги зилзила пайтида биноларнинг катта қисми қулашига тупроқдаги муаммолар сабаб бўлган. Бу ҳақда Туркиянинг Атроф-муҳит, урбанизация ва иқлим ўзгариши вазири Мурат Курумга таяниб, Yeni Safak хабар берди.

Маълум қилинишича, ҳозиргача зилзиладан жабр кўрган 10 вилоятда 47 мингта бинодаги 211 мингта уй вайрон бўлган ёки зарар кўрган. Аҳоли учун 300 мингта уй-жой қуриш кераклиги айтилмоқда.

“Биноларнинг аксарияти ерости қатлами, кучли зилзила натижасида тупроқнинг суюқланиши ва муҳандислик хизмати йўқлиги сабабли вайрон бўлган. Биз ерни ўрганишда ҳам, қурилиш учун янги жойларни аниқлашда ҳам шаҳар эҳтиёжларини инобатга олган ҳолда ўз ишимизни давом эттирмоқдамиз”, — деди вазир.

Расмийнинг таъкидлашича, қулаган уйлар 1999 йилдан олдин, Туркияда ҳалокатли зилзила содир бўлганидан олдин қурилган. Ўша фожиадан сўнг мамлакатда зилзила эҳтимоли бор ҳудудларда қурилиш қоидалари кучайтирилган. Курум маълумотига кўра, жиддий зарар кўрган бинолар бузилади.

“Афтершоклар (зилзиладан кейин содир бўладиган сейсмик тебранишлар) ҳали ҳам давом этмоқда. Газиантепдаги зарарни баҳолашнинг катта қисмини уч кун ичида, Туркиядаги зарарни аниқлашни эса бир ҳафта ичида якунлашни режалаштирмоқдамиз”, — дея хулоса қилди вазир.

18 мингдан ортиқ одамнинг ҳаётига зомин бўлган 1999 йилдаги ҳалокатли зилзилалардан сўнг Туркия турар-жой бинолари қурилишини тартибга солувчи қоидаларни қайта кўриб чиқди. Хусусан, 2007 йилда зилзиладан ҳимоя қилиш учун зарур бўлган талабларни ҳисобга олган ҳолда уй-жой қуриш кодекси қабул қилинди.

Аввалроқ Туркия президенти Ражаб Тойиб Эрдўғон фожиадан кейин вайрон бўлган биноларнинг 98 фоизи 1999 йилгача қурилганини айтди. Президент зилзиладан жабр кўрган ўнта вилоятда камида 41 минг уй вайрон бўлган ёки яроқсиз ҳолатдалиги, уларни зудлик билан бузиш кераклигини таъкидлади.

6 февраль куни Туркия жануби-шарқидаги Қаҳрамонмараш вилоятида 7,8 ва 7,6 магнитудали зилзилалар тўққиз соатлик интервал билан содир бўлди. Зилзила кучи қўшни давлатлар, жумладан Сурияда ҳам сезилди. Охирги маълумотларга кўра, ҳар икки мамлакатда қурбонларнинг умумий сони 41 минг кишидан ошган.