“Бавария” Чемпионлар Лигаси 1/8 финал дастлабки баҳсида “ПСЖ”ни 1:0 ҳисобида мағлуб этди.
Myунхенликлар клуби барча мусобақалар доирасидаги мағлубиятсиз сериясини 20 та ўйинга етказди. Сўнгги бор Юлиан Нагелсманн шогирдлари 17 сентябрь куни “Аугсбург”га ютқазиб қўйганди (0:1). Шундан кейин жамоа 16 ғалаба ва 4 дуранг қайд этди.
Чемпионлар Лигасида эса немис клуби жорий мавсумдаги барча 7 та ўйинни ўз фойдасига ҳал қилди. Тўплар нисбати — 19:2.
“Бавария”нинг учрашувдаги ягона ғалаба тўпини “ПСЖ” собиқ ҳужумчиси Кингсли Коман киритди. Коман 2020 йилги ЕЧЛ финалида ҳам парижликлар дарвозасини ишғол қилиб, “Бавария”га кубокни тақдим этганди.
“Бавария” Чемпионлар Лигаси плей-офф босқичида 12 марта дастлабки ўйинни ютган ва уларнинг барчасида кейинги босқичга чиққан.
“ПСЖ” қаторасига учинчи ўйинда мағлубиятга учради. Аввалроқ жамоа Франция Кубогида “Марсель”га (1:2), чемпионатда “Монако”га (1:3) ютқазиб қўйганди.
Бундай омадсиз серия Париж жамоасида 2020 йилдан кейин илк бор кузатилди. Ўшанда клуб “Бавария”, “Ланс” ва “Марсель”га имкониятни бой берганди. “ПСЖ” кейинги ўйинини 19 февраль куни “Лилль”га қарши ўтказади.
“ПСЖ” 2023 йилда барча мусобақаларда 11 та ўйин ўтказиб, уларнинг 5 тасида мағлуб бўлди (5 ғалаба, 1 дуранг). Жамоа 2022 йилдаги 46 та ўйинда 4 бор ютқазганди.
Лионель Месси “ПСЖ” сафида Чемпионлар Лигаси плей-офф босқичидаги учинчи ўйинда қатнашди. Уларда аргентиналик футболчи бирорта самарали ҳаракат амалга ошира олмади. Ўтган мавсум у “Реал”га қарши ўйинларда (1:0, 1:3) тўлиқ ҳаракат қилган, бироқ гол ва ассист амалга ошира олмаганди.
“ПСЖ” сафида ҳимоячи Уоррен Заир-Эмери асосий таркибда майдонга тушди. 16 ёш-у 343 кунлик футболчи Чемпионлар Лигаси плей-офф босқичида асосий таркибда майдонга чиққан мусобақа тарихидаги энг ёш ўйинчига айланди.
Изоҳ (0)