Туркия ва Суриядаги зилзилалар минтақада ўтган 100 йилдаги энг даҳшатли табиий офатга айланди. Бу ҳақда ЖССТнинг Европа бўйича минтақавий директори Ханс Клюге маълум қилди.
“Бир ҳафта олдин Туркиянинг марказий қисмида ва Сурия шимоли-ғарбий қисмида содир бўлган кучли зилзилалар минтақадаги сўнгги асрдаги энг даҳшатли табиий офат бўлди”, — деди Клуге.
У табиий офат оқибатида минтақада 36 мингдан ортиқ одам ҳалок бўлгани, ҳар икки давлатда камида 26 миллион киши гуманитар ёрдамга муҳтож эканини алоҳида қайд этди. Шу билан бирга, Клюге бу рақамлар якуний бўлмаслиги мумкинлигини таъкидлади. ЖССТ вакили қурбонлар ва жароҳатланганлар сони икки баравар ошиши кутилаётганини қўшимча қилди.
Клюге, шунингдек, ярадорлар сони кўплиги сабаб Туркияда тиббиёт тизими катта босим билан ишлаётганига эътибор қаратди.
“75 йиллик тарихимизда ЖССТнинг Европа минтақасида тез тиббий ёрдам гуруҳларини кенг миқёсда жойлаштиришни бошладик. Уларнинг мақсади қийин вазиятда қолган тиббий муассасаларни қўллаб-қувватлаш”, — дея қўшимча қилди Клюге.
6 февраль куни Туркияда 7,7 ва 7,8 магнитудали кучли зилзилалар содир бўлди. 11 февраль оқшомида сейсмологлар 2100 дан ортиқ ерости силкинишини қайд этган. Вайронкор зилзила қўшни мамлакатларда, жумладан, Сурия, Ливан, Шимолий Кипр Турк республикаси, Греция Кипри ва Ироқда ҳам сезилди.
Туркиядаги зилзиладан сўнг 90 дан ортиқ давлат ўз ёрдамини таклиф қилди. Улар қаторида Ўзбекистон ҳам Туркияга 100 кишидан иборат қидирув-қутқарув отрядини жўнатди.
Изоҳ (0)