Yaponiyaning o‘zini-o‘zi mudofaa qilish kuchlari jangchilari zilziladan jabr ko‘rgan Turkiyaga yordam berish uchun 13-fevral kuni hukumat samolyotida uchib ketdi, deb xabar bermoqda TBS.
Qayd etilishicha, Turkiyaga jami 120 ga yaqin harbiy xizmatchi yuborilishi kutilmoqda. 13-fevral kuni, odatda Yaponiya bosh vaziri tomonidan foydalaniladigan Boeing 777 samolyoti harbiylarning bir qismini qo‘shimcha gumanitar yordam va yerda qidiruv-qutqaruv ishlarini olib borish uchun zarur bo‘lgan materiallar bilan birga Turkiyaga olib ketdi. Turkiyada Yaponiya Mudofaa vazirligi tabiiy ofat oqibatlarini bartaraf etish uchun zarur bo‘lgan ma’lumotlarni yig‘ish va tahlil qilish punktini allaqachon tashkil etgan.
Yaponiya o‘zini-o‘zi mudofaa kuchlari tegishli tajribaga ega – o‘z vatanida yapon harbiy xizmatchilari zilzilalar, ko‘chkilar, tayfunlar va toshqinlardan keyin muntazam ravishda qutqaruv ishlarini olib boradi.
Avvalroq Yaponiya Turkiya janubi-sharqiga 70 ga yaqin qutqaruvchi, shuningdek, insonparvarlik yordami ortilgan bir necha samolyot jo‘natgan edi. Yaponiya hukumati tomonidan Suriyaga ham insonparvarlik yordami yuborilgan.
6-fevral kuni Turkiyada 7,7 va 7,8 magnitudali kuchli zilzilalar sodir bo‘ldi. 11-fevral oqshomida seysmologlar 2100 dan ortiq yerosti silkinishini qayd etgan. Vayronkor zilzila qo‘shni mamlakatlarda, jumladan, Suriya, Livan, Shimoliy Kipr Turk respublikasi, Gretsiya Kipri va Iroqda ham sezildi.
Turkiyadagi zilziladan so‘ng 90 dan ortiq davlat o‘z yordamini taklif qildi. Ular qatorida O‘zbekiston ham Turkiyaga 100 kishidan iborat qidiruv-qutqaruv otryadini jo‘natdi.
Izoh (0)