Nihol” mukofoti sovrindori, xonanda Iroda Dilroz “Sevimli” telekanalining “O‘zim” ko‘rsatuviga bergan intervyusida nima sababdan ijodda tanaffus qilgani, hayotdagi xatolari, oilasi, otasiz voyaga yetgani haqida so‘zlab berdi.
“Ko‘pincha klip suratga olishga vaqt yoki pul bo‘lmas edi”
Hayotda qanday vaziyat bo‘lishidan qat’i nazar inson o‘zini yo‘qotmasligi kerak. Hayotdagi yaxshi his-tuyg‘ularni olib, yanada sevib oldinga intilishi kerak. Har bir inson dunyoga kelibdiki, o‘z hayotini yashab o‘tadi. Yaratgan har bir insonga o‘z ichki dunyosini bergan. Inson hech kimga taqlid qilmasligi kerak, bu fikrlarni olib tashlab hayot bilan hamnafas bo‘lish kerak.
Sakkiz yoshligimda Toshkentga ko‘chib kelganmiz va o‘n bir yoshimda “Tomosha” nomli bolalar teatriga qabul qilinmagannimda hayotim tubdan o‘zgargan. Yaxshi ustozlarning qo‘lida tarbiya topdim. Hamma narsa shu tajribaga ham bog‘liq. Qo‘shiq yozayotganimda uning soniga emas, she’riga e’tibor beraman.
Keyinchalik bir necha yillar davomida “Tomosha” bolalar teatrida ishladim. O‘n bir yoshimda teatrga kelgan bo‘lsam 36 yoshimda u yerni tark etdim. So‘ngra farzandlarimning tarbiyasi bilan mashg‘ul bo‘ldim. Bu paytda radioda qo‘shiqlarimni ham chiqarib turdim. Ko‘pincha klip suratga olishga vaqt yoki pul bo‘lmas edi. Bolalar uchun qo‘shiq yaratdim, boshqa ijodkorlarga havas bilan qaradim.
“Ba’zi bir holat bilan ham sahnaga chiqolmaslik ham ijodkor insonning qalbida yaxshi ma’noda olov yondiradi”
Hozir mening qo‘shiqlarim maktab darsliklarida o‘tiladi. Bu butun umrga o‘zbek tarixida qoladigan narsa. Haqiqiy ijodkor hech qachon tanaffus bilan yashamaydi. Ba’zi bir holat bilan ham sahnaga chiqolmaslik ham ijodkor insonning qalbida yaxshi ma’noda olov yondiradi. U shuni o‘ylab, sahnaga chiqishini tasavvur qilib uzoq yashaydi. Ijodkor ko‘plab qo‘shiq yozgan bo‘lishi, u xalqqa yetib bormagan yoki radioda ketmagan bo‘lishi mumkin. Bu narsalar meni ham tinch qo‘ymas edi.
Hayotda har bir narsa o‘z vaqti bilan sodir bo‘ladi. Yoshlar orasida ham iste’dodlar ko‘p, ko‘pchiligida qo‘rquv yo‘q. Bizda biror bir qo‘shiq yaratilsa, xalq qanday qabul qiladi, deb qaraladi. Hozir bir narsa videoga olinsa, hamma yoqda tarqalib ketadi, avval birorta klip olsak badiiy kengashdan qanday o‘tadi, deb qaralgan. Badiiy kengashdan o‘tsa, xursand bo‘lganmiz. Hozir hamma narsa ochiqchasiga, yoshlarga ham osonroq bo‘lib qoldi. Biroq shu bilan birga juda ham sayozlik ko‘payib ketgan.
“Oilali bo‘lganimdan keyin o‘qish, san’at, xizmatlar, hammasi bir tomon bo‘lib qoldi”
Katta sahnaga chiqqanimga 32 yil bo‘ldi. Bari-bir yoshlarimizni o‘z holiga qo‘yib qo‘ysak bo‘lmaydi. Shogirdlarimga ham bir kuni biz o‘tib ketamiz, sizlar eslaysizlar, deb aytaman.
Oilali bo‘lganimdan keyin o‘qish, san’at, xizmatlar, hammasi bir tomon bo‘lib qoldi. San’atkorman, biroq birinchi navbatda onaman. Onalikni, oilamni joyiga qo‘yib, keyin san’atga oshiqaman.
Inson o‘zidan rozi bo‘lmagunicha, barchadan xafa bo‘laveradi. O‘zidan rozi bo‘lish — Alloh qanday yaratgan bo‘lsa, shunga shukr qilib yashash. Yoshligimda bo‘yim kichkina, unaqaman, bunaqaman derdim. Bu narsalar insonga xalaqit berar ekan.
.jpg)
“Oradan yillar o‘tib otam qaytib kelgan”
Xatolarimni ko‘p o‘ylayman. Biroq aynan o‘sha xatolar insonni haqiqatga yaqinlashtiradi. Otam bilan onam yoshligimda ajrashgan. Oilada to‘rt farzand bo‘lganmiz, onam yolg‘iz o‘zi bizni katta qilgan. Oradan yillar o‘tib otam qaytib kelgan. Ayol kishi qiyinchiliklarni o‘zi yengib o‘tsa, alam qilarkan.
O‘sha paytda onam otam qaytib kelganiga e’tibor bermagani uchun ham indamaganmiz. Vaqt o‘tib otam boshqa oila qurdi. Oyimning biror marta otangni borib ko‘rma, deganini eslolmayman. O‘sha paytda yosh bo‘lganman, nimaga ota biz bilan qoling, birga yashaymiz deb aytmaganimni o‘ylayman. Ularni ko‘p eslayman, juda ham kamtar inson edilar. Vaqt o‘tib otam oila qurdi, yana bitta singlim bor. O‘sha payt hozirgi aqlim bo‘lganida boshqacha ish tutar edim, deb o‘ylayman.
Turmush o‘rtog‘im juda ham oliyjanob inson, shu bilan birga mening ustozim ham. Ba’zida nimalarnidir o‘zimcha hal qilib qo‘ysam, men sening ustozing edim-ku, deydilar.
Izoh (0)