Ирода Дилроз нима сабабдан ижодда танаффус қилгани, ҳаётдаги хатолари ва отасиз вояга етгани ҳақида гапирди

Ниҳол” мукофоти совриндори, хонанда Ирода Дилроз “Севимли” телеканалининг “Ўзим” кўрсатувига берган интервьюсида нима сабабдан ижодда танаффус қилгани, ҳаётдаги хатолари, оиласи, отасиз вояга етгани ҳақида сўзлаб берди.

“Кўпинча клип суратга олишга вақт ёки пул бўлмас эди”

Ҳаётда қандай вазият бўлишидан қатъи назар инсон ўзини йўқотмаслиги керак. Ҳаётдаги яхши ҳис-туйғуларни олиб, янада севиб олдинга интилиши керак. Ҳар бир инсон дунёга келибдики, ўз ҳаётини яшаб ўтади. Яратган ҳар бир инсонга ўз ички дунёсини берган. Инсон ҳеч кимга тақлид қилмаслиги керак, бу фикрларни олиб ташлаб ҳаёт билан ҳамнафас бўлиш керак.

Саккиз ёшлигимда Тошкентга кўчиб келганмиз ва ўн бир ёшимда “Томоша” номли болалар театрига қабул қилинмаганнимда ҳаётим тубдан ўзгарган. Яхши устозларнинг қўлида тарбия топдим. Ҳамма нарса шу тажрибага ҳам боғлиқ. Қўшиқ ёзаётганимда унинг сонига эмас, шеърига эътибор бераман.

Кейинчалик бир неча йиллар давомида “Томоша” болалар театрида ишладим. Ўн бир ёшимда театрга келган бўлсам 36 ёшимда у ерни тарк этдим. Сўнгра фарзандларимнинг тарбияси билан машғул бўлдим. Бу пайтда радиода қўшиқларимни ҳам чиқариб турдим. Кўпинча клип суратга олишга вақт ёки пул бўлмас эди. Болалар учун қўшиқ яратдим, бошқа ижодкорларга ҳавас билан қарадим.

“Баъзи бир ҳолат билан ҳам саҳнага чиқолмаслик ҳам ижодкор инсоннинг қалбида яхши маънода олов ёндиради”

Ҳозир менинг қўшиқларим мактаб дарсликларида ўтилади. Бу бутун умрга ўзбек тарихида қоладиган нарса. Ҳақиқий ижодкор ҳеч қачон танаффус билан яшамайди. Баъзи бир ҳолат билан ҳам саҳнага чиқолмаслик ҳам ижодкор инсоннинг қалбида яхши маънода олов ёндиради. У шуни ўйлаб, саҳнага чиқишини тасаввур қилиб узоқ яшайди. Ижодкор кўплаб қўшиқ ёзган бўлиши, у халққа етиб бормаган ёки радиода кетмаган бўлиши мумкин. Бу нарсалар мени ҳам тинч қўймас эди.

Ҳаётда ҳар бир нарса ўз вақти билан содир бўлади. Ёшлар орасида ҳам истеъдодлар кўп, кўпчилигида қўрқув йўқ. Бизда бирор бир қўшиқ яратилса, халқ қандай қабул қилади, деб қаралади. Ҳозир бир нарса видеога олинса, ҳамма ёқда тарқалиб кетади, аввал бирорта клип олсак бадиий кенгашдан қандай ўтади, деб қаралган. Бадиий кенгашдан ўтса, хурсанд бўлганмиз. Ҳозир ҳамма нарса очиқчасига, ёшларга ҳам осонроқ бўлиб қолди. Бироқ шу билан бирга жуда ҳам саёзлик кўпайиб кетган.

“Оилали бўлганимдан кейин ўқиш, санъат, хизматлар, ҳаммаси бир томон бўлиб қолди”

Катта саҳнага чиққанимга 32 йил бўлди. Бари-бир ёшларимизни ўз ҳолига қўйиб қўйсак бўлмайди. Шогирдларимга ҳам бир куни биз ўтиб кетамиз, сизлар эслайсизлар, деб айтаман.

Оилали бўлганимдан кейин ўқиш, санъат, хизматлар, ҳаммаси бир томон бўлиб қолди. Санъаткорман, бироқ биринчи навбатда онаман. Оналикни, оиламни жойига қўйиб, кейин санъатга ошиқаман.

Инсон ўзидан рози бўлмагунича, барчадан хафа бўлаверади. Ўзидан рози бўлиш — Аллоҳ қандай яратган бўлса, шунга шукр қилиб яшаш. Ёшлигимда бўйим кичкина, унақаман, бунақаман дердим. Бу нарсалар инсонга халақит берар экан.

“Орадан йиллар ўтиб отам қайтиб келган”

Хатоларимни кўп ўйлайман. Бироқ айнан ўша хатолар инсонни ҳақиқатга яқинлаштиради. Отам билан онам ёшлигимда ажрашган. Оилада тўрт фарзанд бўлганмиз, онам ёлғиз ўзи бизни катта қилган. Орадан йиллар ўтиб отам қайтиб келган. Аёл киши қийинчиликларни ўзи енгиб ўтса, алам қиларкан. 

Ўша пайтда онам отам қайтиб келганига эътибор бермагани учун ҳам индамаганмиз. Вақт ўтиб отам бошқа оила қурди. Ойимнинг бирор марта отангни бориб кўрма, деганини эслолмайман. Ўша пайтда ёш бўлганман, нимага ота биз билан қолинг, бирга яшаймиз деб айтмаганимни ўйлайман. Уларни кўп эслайман, жуда ҳам камтар инсон эдилар. Вақт ўтиб отам оила қурди, яна битта синглим бор. Ўша пайт ҳозирги ақлим бўлганида бошқача иш тутар эдим, деб ўйлайман.

Турмуш ўртоғим жуда ҳам олийжаноб инсон, шу билан бирга менинг устозим ҳам. Баъзида нималарнидир ўзимча ҳал қилиб қўйсам, мен сенинг устозинг эдим-ку, дейдилар.