“Hamma shovqin ham musiqa bo‘lavermaydi”. Shuhrat Daryo baqirib kuylayotgan va gitarani “urib” chalayotgan hamkasblari haqida (video) 

Xonanda Shuhrat Daryo “Daryo” internet nashrining YouTube’dagi kanaliga bergan intervyusida baxtni boylikda deb bilmasligi, hayotdagi yagona armoni va ba’zi xonandalar  ijodiga eʼtirozi borligi haqida aytib oʻtdi.

— Sanʼatkor boʻlganimdan juda mamnunman. Moddiy ahvolimdan ham shikoyat qilmayman. Nazarimda, inson baxti faqatgina boylik bilan bogʻliq emas. Doʻstlarimning orasida shoir va yozuvchilar juda koʻp. Ziyoli insonlar davrasida yurganim, hamsuhbat boʻlganim ham katta boylik. Inson badavlat boʻlib, hashamat ichida yashasa-yu, maʼnaviy jihatdan qashshoq boʻlsa bu ham ogʻriqli mavzu, — deydi xonanda Shuhrat Daryo.

Xonanda buyutma sheʼrlar yozdirmasligi va qoʻshiq yaratishda asosan kitoblardan foydalanishining sababini quyidagicha izohladi.

— Qoʻshiq sheʼriga nihoyatda talabchanman. Yaxshi sheʼrga kuy bastalash ham oson kechadi. Ayrim xonandalar shoirlarning sheʼrlari kuyga tushmasligi sabab, maxsus yozdirishlari haqida aytib qolishadi. Bilmadim, mening uslubim unday emas. Asosan sheʼriy kitoblardan foydalanaman. Sababi u kitob boʻlguniga qadar, taqrizchi, muharrir va musahhihlarning qoʻlidan oʻtgan. Ammo baʼzan tasodif sabab uchratib qolingan sheʼrlar ham boʻladi. Oʻtgan yili internetda bir videorolikni koʻrib qoldim. Unda chiroyli sheʼrni oʻqishgan ekan. Bir tinglagandayoq sheʼr maʼqul boʻldi. Uning matnini topolmadim, shundan soʻng eshitib qogʻozga koʻchirib oldim. Juda chiroyli qoʻshiq yaraldi. “Yil ayoli” nomli tanlovda ijro etishimni soʻrashdi. Yaxshi shoirlar koʻp, faqat koʻp hollarda ularning ijodi targʻibot qilinmaydi. Chiqarilgan sheʼriy kitoblar targʻibotiga ham kam eʼtibor beriladi, — deydi xonanda Shuhrat Daryo.

Xonanda Shuhrat Daryo Janob Rasul ijodiga eʼtiroz bildirdi. Bundan tashqari, gitarani ham nozik chertish kerakligi haqida yosh xonandalarga oʻz tavsiyalarini berdi.

— “Labingdagi pomada, yigiting yoʻq chamamda” deb baqirib qoʻshiq aytsa, zoʻr aytayotgandek tuyuladi. Televizorda “Agar oshiqligʻim aytsam, kuyib jon-u, jahon oʻrtar” deb birorta mumtoz qoʻshiqlar efirga berilsa, ayrim yoshlar “Dada sizning ashulangiz chiqdi”, deb sekingina boshqa telekanalga olib qoʻyadi. Xorijlik tinglovchilar uchun oʻzbek mumtoz qoʻshiqlari qiziq. Ammo xalqimiz uchun... Vaholanki, toʻylarda aytilayotgan xorij musiqalarining vatanini surishtirib borsa ularning tarixi ming yilga ham bormaydi. Ularning mumtoz qoʻshiqlari ham yoʻq. Afsuski, ommaviy madaniyatga ergashish va tinglovchi didini shakllantirishda oʻzbek xonandalarining hissasi katta. “Shunaqasini yaxshi eshitishyapti-yu, boʻlaveradi”, deb duch kelgan musiqaga matnni qoʻyib aytaversa, oqibati yaxshi boʻlmaydi.
Keyingi paytlarda gitara joʻrligida qoʻshiq aytish ham urfga aylandi. Ammo baʼzi xonandalarning gitaraga qoʻpol munosabatda boʻlib, jazava bilan uni chalishlari gʻashimni keltiradi. Xorijliklar buni koʻrishsa ustimizdan kulishadi. Chunki gitara ham sehrli soz, uni ham noziklik bilan chalish kerak. Hamma shovqin ham musiqa boʻlavermaydi, — deydi xonanda Shuhrat Daryo.

Shuhrat Daryo hayotdagi yagona armoni haqida koʻziga yosh olib gapirdi. 

— Otamni Makkaga yetaklab olib borolmaganman, faqatgina shunday armon qilaman. Nasib qilsa, onamni muqaddas shaharlarga olib borishni niyat qilyapman. Farzand boʻlib onamning barcha orzularini ushaltirishni va hamisha xizmatlarida boʻlishni orzu qilaman, — deydi xonanda Shuhrat Daryo.

Xonanda bilan suhbatni to‘liq quyida tomosha qilishingiz mumkin.