Turkiyada sodir bo‘lgan zilzila sabab serial va filmlarning suratga olish jarayonlari to‘xtatildi. Aktyorlar xayriya ishlariga jalb qilindi

Turkiyada sodir bo‘lgan zilzila butun mamlakatni larzaga keltirdi, ko‘plab biznes sohalari singari serial va kino sohasi ham to‘xtadi. Taniqli turk aktyorlari ham tabiiy ofatdan jabr ko‘rganlarga yordam berish kompaniyalarini qo‘llab-quvvatlamoqda.

Har hafta turli kanallarda loyihalari bilan ekranga chiqadigan va tomoshabinlar sevib, qiziqish bilan kuzatib borayotgan ko‘plab mashhurlar mamlakatda sodir bo‘lgan tabiiy ofatdan jabr ko‘rgan insonlarga yordam berishni birinchi o‘ringa qo‘ydi. Demet O‘zdemir, Elchin Sangu, Burak Deniz, Mert Firat, Alper Kul, Umut Kurt, Esra Bilgich, Burju Birijik, Sila Turkog‘lu, Selma Ergech kabi ko‘plab aktyorlar xayriya posilkalarini shaxsan tayyorlayotgani va ko‘ngillilar bilan ishlayotgani aks etgan suratlar ijtimoiy tarmoqlarda tarqaldi.

“Oyna ortidagi qiz”, “Mening ismim Farah”, “Klyukvali sharbat”, “Hukm” kabi ko‘plab seriallarida suratga tushgan aktyorlar fuqarolarga har tomonlama yordam berishga harakat qilmoqda, baʼzi hollarda esa ularning vayronalar ostida qolgan insonlar haqida juda muhim maʼlumotlarni tarqatayotganini ko‘rish mumkin. Shu bilan birga, Kivanch Tatlitug‘, Hatije Shendil, Burak Deniz, Demet O‘zdemir, Eda Eje va boshqa ko‘plab aktyorlar ham moliyaviy yordam ko‘rsatgani ma’lum qilingan.

Bu jarayon bir qancha vaqt oldin ijtimoiy tarmoqlarda “Suratga olish jarayonlarini to‘xtating” so‘zlari bilan boshlangan edi. Zilzila sodir bo‘lgan hududdagi insonlarga yordam ko‘rsatish uchun karvonlar, generatorlar, chiroqlar va ba’zi jihozlar yuborilgan.

Tashkilotlar tashabbusi bilan boshlangan ushbu aksiyani aktyorlar ham ijtimoiy tarmoqlarda e’lon qildi. Bir muncha vaqt o‘tgach, ko‘plab ishlab chiqarish kompaniyalaridan suratga olish to‘xtatilgani va karvonlar, generatorlar va boshqa materiallar zilzila sodir bo‘lgan hududlarga ko‘chirilgani haqida xabarlar tarqaldi.

Yana bir bayonot e’lon qilindi. Unda televideniye va kino ishlab chiqaruvchilar uyushmasi bayonot bilan chiqdi. Ushbu bayonotga ko‘ra, uyushma, jumladan, ko‘plab seriallarni ishlab chiqaruvchi kompaniyalar serial va filmlar ustida ishlashni, suratga olish jarayonlarini to‘xtatgani ma’lum bo‘ldi.

Shuningdek, ular ishlab chiqaruvchi kompaniyalardan moliyaviy yordam va tarqatma materiallar yig‘ishlarini, AFAD va AHBAP orqali zilzila qurbonlariga yetkazilishini ta’minlashlarini bildirdi.