Туркия президенти Ражаб Тоййиб Эрдўғон Туркиядаги зилзилалар кучини атом бомбаси портлашига қиёслади, деб ёзмоқда Deutsche Welle.
Туркия раҳбари бу ҳақда пойтахт Анқарадаги Табиий офатлар ва фавқулодда вазиятларни бошқариш бўйича Президиумда (AFAD) бўлиб ўтган йиғилишдан сўнг гапирган. Эрдўғон Туркия жанубидаги юз минглаб бинолар яшаш учун яроқсиз ҳолга келгани, 2,2 миллиондан ортиқ одам зилзиладан жабр кўрган ҳудудларни тарк этганини айтди.
“Дунёдаги барча мутахассисларнинг умумий фикрига кўра, Қаҳрамонмарашдаги зилзилалар ўз кўлами, вайронкорлиги ва кетма-кет содир бўлиши билан истисноли табиий ҳодиса сифатида баҳоланмоқда”, — дея Туркия раҳбарининг сўзларини келтиради TRT World.
Эрдўғон 6 февраль куни минтақани ларзага солган 7,7 ва 7,6 магнитудали зилзилалар оқибатида 10 та вилоят энг кўп зарар кўрганини таъкидлади.
“Фалокат майдони дунёнинг кўплаб мамлакатлари ҳудудидан ошиб кетди. Зилзила ер юзасидаги шундай қисқа — 7 километр масофада содир бўлганига қарамай, инсоният тарихидаги бошқа йирик зилзилалар билан солиштирганда вайронагарчиликлар кўламини сезиларли даражада оширди. Кетма-кет содир бўлган зилзилалар юзлаб энг кучли атом бомбаларига тенг энергия чиқарди”, — деди у.
Туркия президентининг сўзларига кўра, табиий офатда вайрон бўлган барча биноларнинг 98 фоизи 1999 йилгача қурилган — ўша йили Туркиянинг Мармара минтақасида кучли зилзила юз берган ва 18 минг киши ҳалок бўлганди. Ўша пайтдаги воқеалар янада қаттиқроқ, зилзилаларга чидамли қурилиш меъёрларининг қабул қилинишига олиб келган. Эрдўғон зилзила оқибатида вайрон бўлган ёки яшаш учун яроқсиз ҳолга келган барча уй ва иш жойларини қайта тиклашга ҳамда уларни эгаларига топширишга ваъда берди.
“Март ойи бошидан зудлик билан 30 минг уй қурилишини бошлаймиз. Мақсадимиз — бир йил ичида сифатли ва хавфсиз биноларни қуришни якунлаш. Зилзиладан жабр кўрган ҳудудларда уй-жойга бўлган эҳтиёжни қондиришимиз керак”, — деди у. Эрдўғон Туркиянинг Атроф-муҳит, урбанизация ва иқлим ўзгариши вазирлиги минтақада янги уйлар ва шаҳарлар қурилиши учун тайёргарликни бошлаётганини қўшимча қилди.
Эслатиб ўтамиз, Туркия жануби-шарқида ва Сурияда содир бўлган кетма-кет вайронкор зилзилалар қурбонлари сони 40 мингдан ошди.
Изоҳ (0)